Watford manager Quique Sanchez Flores chuan Tottenham manager Mauricio Pochettino chu hahipin a fak a, tun hnai kum li kalta chhunga manager tha ber a nih thu a sawi.

Pochettino-a’n Spurs a enkawl atangin nasa takin North London club hi an thanga, transfer window vawi hnih ngawt bazar lo mahse season liamta khan Pochettino hian Tottenham chu Champions League final a thlenpui.

Pochettino-a hnuaiah Tottenham hi team chhia an ni ngai lova, team vantlang chung niin, England-a team tha ber berte elphakah an inhlangkai a tih thei.

Tun Inrinni tlai hian Watford chuan Tottenham hi an luhchilh dawn a, Watford boss Flores chuan Argentine manager Pochettino a fak hreh lo hle.

Flores hian Watford hi tum hnih a enkawl tawha, kum 2015 leh kum 2016 chhung khan Watford enkawlin, kumin atang khan Watford hi a enkawl leha, Pochettino chuan Watford-a a awm hmasak lai atang tawh khan tha a tih thu a sawi tel.

Flores chuan, “Pochettino hi ka mi ngainat zawng tak a ni a, tun hnai kum li kalta chhung khan ka hmuhdan chuan Premier League-a manager tha ber a ni.

“Watford ka enkawl hmasak pawh khan a team-te khelh dan atang khan coach tha berah ka ngai tawha, tunah erawh hun harsa an tawng meka, mahse tun kum li liamta chhunga Premier League coach tha ber a ni,” a ti.

Tottenham leh Watford-te hi Inrinni tlai dar 7:30-ah an inhmachhawn dawn a, Tottenham hian khelh riatah point 11 hlawhchhuak tawhin pakuanaah an awm meka, Watford hian khelh riatah point 3 chiah la hlawhchhuakin league mawngphahah an awm mek a ni.