22 May 2020 09:48

bakteaJr.

Mizo tlangval

​Haaland hian Ronaldo a tluk thuak thei: Rivaldo

Brazilian footballer hlui Rivaldo chuan tunlai striker naupang goal khung thei em em Erling Haaland chu a faka, Haaland hian Brazilian Ronald kan tih mai thin Ronaldo Nazario chu a tluk thuak thei niin Rivaldo hian a sawi.

Tun hnaiah Norwegian striker Haaland aia goal khung thei hi an awm bik rih lova, kum 19 mi hian January thla tir khan German club Borussia Dortmund zawmin, Dortmund tan hian goal 13 a khung tling der tawh.

Haaland hi fak rawn a ni a, a phu reng bawka, club lian te pawhin an ngaihven hle a, tun atanga kum hnih vel a vei leh chuan Europe-a club lian ber zinga pakhatah a khelh tawh ngei a rinawma, chu ai hma pawhin club lianin an lei lovang tih a sawi theih loh.

Rivaldo chuan Haaland-a chungchang a ziahnaah, “Player ropui a ni der tawha, kum 19 mi chauh a la nih avangin a la that belh zel theia, khawvela attacker hlauhawm ber zinga mi a ni thei.

“A khelh hian hlauh a nei lova, khelmual chhungah a ‘cool’ em em bawka, world class player nasa taka hma la sawn thei a ni a, club tam takin an ngaihven pawh hi thil mak a ni hauh lo.

“Haaland-a khelh dan hi Ronaldo Nazario nen mi tam takin an khaikhin tan tawha, inanna lai pawh an nei ngei mai; Haaland hi a che ranga, hlauh a nei lova, goal khung thei em em bawk mahse Ronaldo rawn thlak tu a ni dawn em tih sawi nan erawh chuan a la hma mah mah.

“Ronaldo khan World Cup nomawi vawi hnih a chawia, World Cup pali ah a khel bawk. A goal thun hmangin khawvel a men phawk tira, chuvang chuan Haaland hian Ronaldo a tluk em tih hriat nan chuan hun kan la mamawh. Mahse Haaland hian ka team mate hlui ropui tak tluk thuak thei tur khawpin talent erawh a nei ngeiin a lang.

“Nipui lo awm turah hian Real Madrid chuan Haaland hi lakluh ngei an tum dawnin a langa, Haaland hian Spanish football-a che tha thei turin quality a nei. Goal hmaah a hriam em em a, Barcelona pawh pan se a tan a tha hle dawna, tu pawhin an lei thei a nih chuan club tan vanneihna lian tak a ni ang.

“Dortmund-in January thla khan euro maktaduai 20 sengin an laluta, a man let li vel tala an hralh theih a rinawma, Dortmund tan pawh hlawkna a ni dawn. January thla khan Real Madrid leh Barcelona te khan Haaland kha an ngaihven hman lutuk lo niin a langa, mahse hetiang takin Dortmund-ah a che tha nghal ang tih ngaihna tu mahin kan hre lo.

“January thlaa Barca in an lalut lo kha an tisualah ka ngaia, Austrian league atangin Europe-a league lian ber pakhatah a che tha nghal dawn em tih hi tu tan mah hriat lawk theih a ni lo. Real Madrid-ah khan lut ta se, substitute mai a ni dawna, mahse tunah hian a lut a nih chuan star player angin a lut tawh dawna, inkhel bul tan ngei tur a ni tawh dawn a ni,” a ti.