Borussia Dortmund sporting director Sebastian Kehl chuan an striker chhuak tur anga sawi Erling Haaland chu kumin nipui bazar inhawn hunah a chhuak dawn lo tih a sawi.

Haaland hi Europe-a player luck ber zinga mi a ni a, club liante duh rawn niin, nipui bazar inhawn leh vela chhuak mai tur angin chanchinbu mite chuan an sawi nasa hle.

Dortmund hian an striker hi a chhuak dawn a nih chuan a manah pound maktaduai 150 vel lai an duh nia sawi a ni a, mahse nakkum nipuiah Haaland hi a release clause pound maktaduai 65-in a khulchhuah theih dawn.

Kum 20 mi Haaland-a release clause hi tunah a la nung lova, nakkum nipui atang chiaha a nun dawn avangin, club lian te hian nakkum an nghah a rinawm viaua, an inchuh nasat hle a rinawm a ni.

Sebastian Kehl chuan, “Season lehah Erling Haaland hi Borussia Dortmund tan a la khel dawn tih hi ka hria. Erling pawh hian rem a ti veka, nitin kan inhmua, club nen an thil thlir dan a inang,” a ti.

Haaland hian goal a khung thei hle a, tun season-ah Champions League-a goal khung hnem ber niin, goal 10 a khunga, competition zawng zawngah Dortmund tan game 38 khel tawhin goal 37 ngawt a khung tawh.

Thla hmasa khan Haaland-a agent Mino Raiola leh a pa Alf-Inge te chuan Barcelona leh Real Madrid an tlawh ve ve a, hemi avang hian Haaland hi Spain-a insawn tur anga sawi a ni nasa zual hle a ni.