Real Madrid midfielder hlui Wesley Sneijder chuan Real Madrid a zawm tirh khan first XI atangin Guti a nek chhuah avangin Guti chuan thla thum chhung ngawt a be duh lo tih a sawichhuaka, mahse Guti chu a khelhpui tawh zawng zawnga player tha ber a nih thu Sneijder hian a sawi lang tel bawk.

Kum 2007 khan Real Madrid chuan Dutch player pathum an lalut a, Royston Drenthe leh Arjen Robben te leh Sneijder te an ni a, Sneijder-a manah Real hian Ajax chu euro maktaduai 30 dawn pe in, kha tih hunlaia Dutch footballer man to ber a ni nghe nghe.

Santiago Bernabeu-a Sneijder a luh tirh hian Real Madrid chhulchhuak Guti chu Sneijder hian a nek chhuak titih a, a hmaa khel rim em em thin, Real vice-captain ni bawk Guti chu Sneijder a inkhelh avangin bench lamah dah a ni fo. A tir lamah Guti hian Sneijder hi a be duh lo niin a langa a hnuah erawh hlawhtling takin midfield-ah an inkawp zui ta a nih kha.

Sneijder chuan, “Real Madrid ka zawm khan starting XI ka chang nghal titih a, Guti kha bench lamah a awm phah bawk nen thla thum chhung ngawt min be duh lo. Mahse a hnu kha chuan kan khel dun ta a, kan in man hle bawk.

“Kan inman em avang khan en lo pawhin kan awmna tur kha kan inhriatsak zung zunga, ani kha player tha tak niin, ka khelhpui tawh zawng zawngah chuan a tha ber hial awm e. Player tha em em a ni a, ani aia keimaha nghawng nei na hi an awm kher lovang,” a ti.