11 Sep 2019 09:14

bakteaJr.

Mizo tlangval

​Gurpreet vangin point thum kan hlawhchhuak lo : Qatar coach

2022 World Cup leh 2023 Asian Cup joint-qualification ah Qatar chuan Doha khawpuiah India an lo mikhuala, team hnihte hi goal awm lova inhnehtawkin point khat ve ve an hlawhchhuak.

India hian point khat an hlawhchhuak hi an lawma, India coach Igor Stimac pawhin Qatar laka point an hlawhchhuah hrim hrim chu a lawm thu a sawi tawh. Qatar hi tunah chuan Asian team tha ber an tih theiha, he inkhelah pawh hian India hi nawr ber viau mahse goal an khung thei lo.

Qatar hian chance an ngah hle a, India goalkeeper leh he inkhela India captain ni bawk Gurpreet Singh Sandhu a rim malh malh hle a, Gurpreet hi a che tha hle bawk. India hi sawi tawh angin bet zawk mahse 2022 World Cup thlengtu tur Qatar lakah goal an chhuah lo tluan hi hmasawnna a tih loh theih loh.

Qatar coach Felix Sanchez chuan, “Kan beisei ang ngeiin inkhelh a harsa hle a, chance tam tak siam chhuak mah ila kan vanneih zan a ni lova, goal kan khung lo tluan. Point thum kan hlawhchhuah loh avangin kan lung a awi lo hle a, ka player-te hian goal khung thei turin quality an nei tha a, mahse kan hriam tawk lo.

“India goalkeeper a fakawm hle a, a mah avang khan point thum kan hlawhchhuak lo. Mahse zinkawng a la thuia, kan theihtawp kan chhuah zel dawna, a dawt leh round khel tura inpet tlin ngei kan tum. India laka kan result-ah kan lung a awi lova, chance 25 chuang insiam mah ila goal kan khung thei lo.

“Kan bei zel dawn a, kan khelh that ber zan nilo mahse he kan result hian hma min sawn tir dawn chiang. A hma aiin kan bei nasa dawn a, second round khel tura inpet tlin ngei kan tum dawn a ni,” a ti.