Real Madrid midfielder thar Arda Guler chu a khup hliam zai a ni dawn ta nge nge a, engtia rei nge a chawlh dawn a hriat loh.

Kum 18 mi chauh a ni a, tun nipui bazar inhawn laiin Real Madrid chuan Fenerbachce atangin an la lut. Guler hi training a neihnaah a khup a ti hliam palh hlauh a, July ni 21 atang khan first team training a zawm thei tawh lo.

A hliam hi uluk taka endik a nih hnuin zai an tum ta a, Manuel Leyes chu Guler zaitu tur niin media te chuan an tarlang.

Manuel Leyes hi surgeon thiam tak a ni a, kum 2016 khan Luka Modric chu hlawhtling takin a lo zai tawh a, Kum 2019-ah Marco Asensio a zai a, Sergio Ramos pawh kum 2021 khan hlawhtling takin a zai.

Guler hi thla hnih emaw vel a chawlh rin a ni a, international break zawh hnuah a lo kir leh theih beisei a ni.