10 Jan 2019 04:35

inkhel

Guingamp in PSG kal tluang lai an titawp

Paris Saint-Germain chuan Coupe de la Ligue ah ngam loh an tawng a, Ligue 1 mawng phaha awm Guigamp chu 1-2 in an hneh lo a, an tla fel der mai.

Kum nga chhung chu a zawnin Paris Saint-Germain hian Coupe de la Ligue title hi an la tawh a, tun season chhungin Ligue 1 ah an la tlawm miah lo bawk a. Mahse, Guigamp lakah an tlawm a, semi final an lut thei ta lo a ni.

PSG khelmuala inkhelah goal a lut har hle a, first half chhungin goal a lut lo tluanchhuak a. Second half an khel leh a, minute 61-ah Guingamp chuan penalty an hlawh hlauh mai a, hei hi Marcus Thuram chuan a pet a, a thun lo zui a.

Minute 63-ah Neymar chuan Guingamp goal-ah ball a tauh lut a, mual neitu PSG chu 1-0 in hma a hruaipui a. He goal a luh hnu hian PSG chuan chak ngei turah an inngai hman a, mahse an goal a veng him tluanchhuak ta tlat lo a ni.

Minute 81-ah Guingamp chuan a vawi hnihna atan penalty an hlawh leh a, Yeni Ngbakoto chuan penalty hi a pet ve thung a, Thuram ai chuan a hlawhtling a, an si phurh chu a sut thei ta hlauh a ni.

Hun tawp a hnai tawh hle a, minute 87-ah rin loh takin Guingamp chuan goal an thun leh hlauh mai a. Penalty pet goal lotu Thuram chuan mikhual tan goal thunin Guingamp hian 2-1 in hma an hruai ve thung a ni.

Hemi hnu hian Guingamp box chhungah Veratti chu a tlu a, Neymar, Edinson Cavani leh Marco Veratti te chuan penalty an beisei avangin an sawisel nasa hle a, hei vang hian an pathumin yellow card an hmuh phah a ni.

Hun tawp thlengin goal dang a luh belh tawh lo a, Guingamp chu 2-1 a chakin semi final an lut ta a. Tun season chhunga inelna hrang hranga game 20 chhung hneh lo nei lo PSG record belh zel tur chu Guingamp hian an titawp ta a ni.

Guingamp bakah hian 1-0 a Le Havre hnehtu Girondins de Bordeaux te, hun pangngaia 1-1 a an inhnehtawk hnua penalty shootout hmanga 8-7 a Rennes hnehtu AS Monaco te leh 2-1 a Olympique Lyonnais hnehtu Strasbourg te chuan semi final an lut bawk a ni.