08 Nov 2019 06:31

inkhel

Guardiola hi manager tha ber a ni: Klopp

Jurgen Klopp chuan a elpui ber ni mek, Manchester City boss Pep Guardiola chu khawvela manager awm zawng zawng zingah chuan a tha ber a nih thu a sawi.

Pathianni zan dar 10:00 ah khian Premier League hmahruaitu pahnih Liverpool leh Manchester City te chu an inhmachhawn dawn a, kuminah league champion nih theih beiseiawm ve ve pahnihte hi Reds ho khelmual Anfield-ah an inkhel dawn a ni.

Tun hnaiah Pep Guardiola chuan Sadio Mane chu tluk der ching niin a sawi a, hemi chungchang hian thawm a nei deuh hluai a, Jurgen Klopp chuan hemi chungchang hi chu an dah tha tawh niin a sawi a ni.

Klopp chuan, “Keini ho hi chu engtik lai pawhin mi hian thil min zawt thin a ni ber a, hetiang a nih avang hian a chang chuan ngaihtuah chiang mang loin kan lo chhang liam leh puat thin,” a ti.

“Pep Guardiola pawh hian Mane chungchang kha a sawi sual palh mai mai niin ka hria a, ngaihtuahna tibuai zui tur chi niin ka hre lo a. A hnuah khan amah berin a rawn sawi fiah tawh a, kha vang khan kei chuan ka theihngilh zui mai a, harsatna a awm lem lo,” a ti bawk.

A sawi zelnaah, “Guardiola hi ka zah em em a, tunah phei chuan khawvela manager tha ber a ni a. Tun dinhmunah chuan a team hi tha viau mah se hneh ve theihna hun tha kan nei thei dawn a ni tih hi sawi chhuah loh chi pawh a ni lo,” a ti.

Liverpool boss Klopp chuan Pathianniah chuan point 6 a City aia an chungnunna ken kawh zui ngawr ngawr ai chuan chak ngei tuma khelh an duh dawn thu a sawi chhuak a. An inkhelh hunah chuan theihtawp chhuahin an khel ang a, point 3 hlawh chhuah theih ngei an tum dawn niin a sawi a ni.