08 Nov 2018 03:30

inkhel

​Guardiola-a'n VAR a duh

Champions League-a Manchester City leh Shakhtar Dosnetsk inhmachhawn tumin mual neitu lam City hi si ruk faiin an chak a, City goal zinga phnihte chu penalty spot atanga khung an ni.

City-in penalty pahnih an hmuh zinga pakhat hi referee tihsual vang a ni chiang hle a, tu tan mah phat rual a ni lo. City player Raheem Sterling chuan Shakhtar box chhungah hian ball khalhin, lei a chhuih palh avanga tlu zuiin referee chuan penaty a pe. Referee hi Sterling-te hnunga tlan a nih avangin a tan hmuh a har hle a, VAR awmse chu sut leh a ni ngei ang.

City manager Pep Guardiola chuan penalty a nilo tih a hriat thu leh VAR  hman a duh thu sawiin, “Penalty a ni lo tih kan hria a, Sterling khan ball khawih tumin lei a chhir palh a ni. Khatiang avanga goal thun kha ka duh lova, mahse Sterling pawh khan replay-a a ennawn hma chu engtianga tlu nge a nih a hre bik lo.

VAR hi eng nge a nih kan hre veka, referee-te hi tanpui an ngai a, tihsual neih an duh bik lo. Tha taka inkhel enkawl an duh a mahse inkhel a ran thin em avangin tihsual an nei lo thei lo a ni. Penalty a nih leh nih lo chungchanga thutlukna siam tur hian second thum vel bak an nei ngai lo,” a ti.

Shakhtar hi 6-0 laia an tlawm avangin penalty an chawi dan chunchang hian sawi a hlawh loh phaha, Shakhtar manager Paulo Fonseca chuan chhuanlamah hmang lovin, “Khatiang taka chak loh hnu chuan penalty an hmuhdan kha sawi ngaiin ka hre lova, mahse thutlukna dik lo tak a ni. Tu pawhin a dik loh zia kan hmu a, mahse khami avanga chak lo kan nilo,” a ti ve bawk.