​Guardiola-a’n Sarri a chhan

23rd February 2019, 07:02AM

Chelsea chuan nikum nipui lai khan Napoli atangin Italian manager Maurizio Sarri an laluta, season tan tir lamah che chhe lo hle mahse tunah erawh an che chhe angreng hle a, tun hnaia an result phei chu a zahthlak thin hle.

Supporter lamin Sarri hi an duh lo chho hle a, chanchinbu mite pawhin Chelsea hian Sarri hi an ban hnai tawh hle niin an tarlang ve mek bawk. Chelsea hian manager ban an hrat zia chu football khawvelin a hai lova, World Cup nomawi chawi thei coach pawh thla sarih an rawih hnua ban hreh lo an ni.

Tun hnaiah erawh Chelsea kalhmang hi a danglam chho ve hle tawh a, mahse an result hian hma a sawn loh chuan Sarri hi an ban lovang tih a sawi theih loh. Chelsea hian tun Sunday zan hian Carabao Cup final-ah Manchester City an hmachhawn dawna, City laka an result hian Sarri awm dan tur a hril thui hle a rinawm.

City manager Pep Guardiola chuan Sarri chu chhanin, “City ka enkawl tirh khan, club khan min ringhlel ngai lo. Eng game-ah emaw ka chak loh chuan min ban dawn tih thu kha chanchinbu miten an tarlang ve ngai lem lo bawk.

“Thil hi tum angin a kal vek lova, hun pek a ngaih chang pawh a awm thin. Maurizio-a season hmasa ber pawh hi chutiang chu a ni a, hun kan mamawh theuh a, kei kha chu City-ah khan min thlawp tha hle a ni,” a ti.

Chelsea hian kum hnih chhunga Premier League title leh FA Cup anmahni chawipui thei tu manager Antonio Conte banin trophy la la ngai lo Sarri hi an ruai a, a chunga rinna an nghah zia chu lang mahse tunah erawh Chelsea lam rilru hi hriatthiam a harsa hle.

Guardiola pawh hi City a enkawl tirhin a che tha bik lo hle a, Sarri-a season hman mek leh Guardiola-a’n City a enkawl hmasak ber season khaikhinin, Sarri hi a la che tha zawk a tih theih. Chelsea hi bazar thei lo turin FIFA-in a hrem chho ta bawk nen, manager an thlak dawn nge, Sarri-ball beiseiin Sarri hi an ruai chhunzawm dawn tih chu football khawvel ngaihchan rawn pakhat a ni.

Copyright © inkhel.com 2024. All rights reserved.