​Guardiola-a thukhawchang

21st April 2019, 08:04PM

Manchester City chuan Premier League champion an nihna humhim an tumna kawngah inrinni tlai khan inkhel pawimawh tak khelin Tottenham an lo mikhuala , City hi Phil Foden-a goal awmchhun hmangin an chak.

City hi season liamta khan hneh takin an champion a, tun season-ah erawh Liverpool nen hma an inhruai chhawk zat zat thunga, game tawp ber thlengin champion tur hi a chian a rinawm loh.

Champions League quarter-final ah Tottenham hian City hi an pet tla zo chiah a, nilai zan mai khan Tottenham hi City lakah away goal rule hmanga tlangin Champions League semi-final an lut.

Tottenham an hneh zawhah Guardiola chuan, “Kan khelh that ber zan a ni lo chianga, anni khan hloh tur nei lovin an khela keini erawh Premier League hloh thei dinhmunah kan ding thung. Nilaini-a kan chak loh hnu khan thil a khirh em em a, mahse hetiang game harsa hmachhawn hi nuam ka ti.

“Tottenham lakah inkhel bul kan tan tha em em a, team tha tak an ni a, mahse keini pawh kan chhe bik lo. Season liamta khan point 100 hmu in kan champion a, tunah point 86 kan hlawhchhuak leh tawh a, hei hi ka career-a ka hlawhtlinna lian ber zinga mi a ni.

“Point 100 hmu in kan champion a, tun season-ah erawh Liverpool that ber tum kan tawng a, ka hmachhawn tawh zawng zawnga team tha ber pakhat an ni. Ni thum danah kan khel zat zat bawk a, a ropui hle in ka hria. Premier League hi lak nawn leh ngei ka duh a, mahse kan thei lo a nih pawhin ka vui lutuk lovang.

“Tottenham hi an khelh hmabak enin top 4-ah an tel dawn chiang a, chuvang chuan kan lakah khan phur rit lutuk an nei lo. Phur rit lutuk an neih loh avang khan kan hneh thei hi thil lian tham tak niin ka hria,” a ti.

Copyright © inkhel.com 2024. All rights reserved.