Joao Cancelo chuan Manchester City a chhuahsan chhanah dawt a tel tih a sawi.

Kum 29 mi hian tun season chhung atan loan-in Barcelona a zawm a, season hmasa chawhnu lam khan Bayern Munich-ah awm. Barca nena an inremnaah lei zui theihna a tel lova, nipuiah lei ngheh an tum dawn tih thawm a awm.

Portuguese full-back hian khelhna hmun a chan tam loh avangin Etihad Stadium a kalsan a, season liamta atanga khan City manager Pep Guardiola-in a chhawr duh lo. Spanish manager hian Nathan Ake leh Rico Lewis-te a thlan zawk avangin inhmuhthiam lohna an nei a, an inkar a chhiat phah hle niin a lang.

Cancelo chuan, "Dawt thuthang leh titi a tam a zia lo tak a ni. Midang tana hnawksak ka ni ngai lova, Ake emaw Lewis emaw khei zawngin vawi khat mah ka awm lo. An lakah in dah chungnunna emaw rilru chhia emaw ka pu lova, kan buai anih chuan team boruak a chhe thei tih ka hria.

"Chanchin kan neihlai khan a chhe zawng hlirin ka chungchang an sawi a, zep loh chuan hriatthiam a har ve khawp mai. Ka awmlai khan kum thum chhung chu player pawimawh ka ni a, ka theihna zawng zawng hlanin theihtawp ka chhuah ve thin. Kan ina misual an lo luh tum kha ka la hre reng a, kut min thlak bakah kan thil neih hlu tak tak an la.

"A hnu ni khat lekah Arsenal hmachhawnin Emirates Stadium kan tlawh a, in lamah thlaphang takin ka nupui leh fanute an awm. Guardiola-in kei aia thil tih theihna a neih tam avangin duh duh a sawi a, engmah sawi loin ka ngawi zel thung. Thudik a dingchang thin tih ka hriat avangin ka in ti pachang a, lam tang ka nei tlem khawp mai.

"Eng eng emaw a thlen hnuah loan-in Bayern Munich ka pan a, City-in Champions League chawi mahse ka inchhir lo. Thutlukna dik ka siam niin ka hria a, min duh tak tak tute kianga awm tluk a awm lo. Ka hlawh thin aia hniam hlawhin Barcelona ka zawm a, hetah pawh inchhirna em em ka nei hran lo. Min lakluh hma khan tum thum lai kan in dawr hman a, a tawp a tawpah a hlawhtling ta a ni." tiin Portuguese chanchinbu A Bola hnenah a sawi.

Sawmna : Website advertisement hi min click sak ve thin turin kan sawm a che u.

Benfica atanga lo chawrchhuak niin, Juventus, Inter Milan leh Valencia-ah te pawh a khel tawh thin a, 2019 Thitin thlaah £27.4m-in City a pan. City tan hian intihsiakna hrang hrangah game 154 khelin goal 31 a thawkchhuak a, Premier League vawi thum chawipuiin Carabao Cup vawi khat an la bawk. Barca tan season kal mekah vawi 32 a inlan tawh a, La Liga bikah chuan vawi 29 niin, game 22-ah inkhel bul a tan a ni.