Khawvela newspaper hlun leh mite chhiar hnem English newspaper The Guardian chuan 2014 chhunga footballer tha berah Portuguese forward Cristiano Ronaldo a thlang.

The Guardian hian mithiam ruaiin, hengte hian vote an thlak a. Hetah hian induhsakna ang chi kha a awm ve lo nia sawi a ni. FIFA in Ballon d'Or dawng tur Vote an thlak chang hi chuan mahni ram mite an duhsak thin a, awmanglo tak taka vote chang te pawh a awm thin. Guardian-in vote an thlaknaah erawh an performance atangin uluk taka an zirchian hnuah vote an thlak ta thin a ni.

Tichuan Real Madrid forward chuan vote 74% lai a hmu a. Argentine playmaker Lionel Messi chuan vote 12% chauh a hmu a. Germany 2014 world Cup champion puitu goalkeeper tha Manuel Neuer chuan vote 8% a hmu a. Thomas Muller chuan vote 4% hmuin, Juventus midfielder Pogba leh Bayern Munich midfielder Arjen Robben chuan vote 1% ve ve an hmu a ni.

Nikum leh nikum hmasa khan Messi chu Guardian hian player tha berah an thlang a, kuminah erawh Messi hian Ronaldo a phak lo hle mai. The Guardian hian europe football league hrang hrangte zirchiangin, English Premier League chu league tha berah an thlang a, Spanish La liga chuan dawtin, Germany Bundesliga chu pathumnaah an dah a, Italian Serie A chu palina niin, Ligue 1 chu pangana an ni.

League tha ber an thlan dan hi chu 2014 chhunga football player tha 100 chuang an thlahchhuahte atangin khawi league-a khel nge tih an chhut a, English premier league chuan player tha a hui hnem ber a, chuvang chuan league tha berah Guardian hian an thlang ta a ni. Player hmasawn berah Guardian hian Chelsea midfielder Eden Hazard an thlang a. Nikum lamah 50-na hnuai lamah a awm a, kuminah erawh top 15 ah a rawn inhlangkai a ni.