Chinese club Guangzhou Evergrande chuan Paulinho man atana Tottenham chhiarzat an ngam a, Brazilian midfielder hi kum li daih contract ziahpuiin an lalut dawn.

Kum 27 mi Paulinho manah Guangzhou hian £9.8m an seng dawn a, Andre Villas-Boas hnuaiah khel pha thin mahse Portuguese manager hnua London club enkawl tawhtu Tim Sherwood leh Maurico Pochettino hnuaiah erawh bench luahlumtu a ni deuh ber.

Spurs hian kum 2013 khan Corinthians atangin an lei a, amanah £17m sengin a hunlai hian an club chanchina player manto ber a ni.

Paulinho hian season liamta khan game 15 chiah a khel pha a, Ryan Mason leh Nabil Bentaleb-te a luahlan zo lo va Copa America khelh mek Brazil squad-ah pawh hmun a chang lo.

Italian club pathum Juventus, AC Milan leh Roma-te pawhin lakluh an lo tum tawh thin a, tunhnaiah Watford nen sawizawm an ni leh a Tottenham tan hian game 67 khelin goal 10 a khung hman.

Guangzhou hi Brazil coach hlui Luis Felipe Scolari enkawl mek a ni a, kum 2013 Confederations Cup-ah khan Chelsea manager hlui hian Paulinho hi Brazil tana khel tur a koh zingah a telh nghe nghe a ni.