Brazil chuan kumin World Cup bul tan tha lem lo mahse an game hnuhnung pahnihna hnehna an chang ve ve a, point 7 hlawhchhuakin Group E winner an ni ta a, Switzerland chuan point 5 neiin an dawt a, Serbia leh Costa Rica te erawh an tla ta a ni.
An game hnuhnung berah Brazil hian si hnih faiin Serbia an hneh a, Paulinho leh Thiago Silva ten goal an khung. Switzerland chuan a mawngphah Costa Rica 2-2 in an inhnehtawkpui a, Blerim Dzemaili goal khung chu Costa Rica tan Watson chuan a rul. Drmic chuan Switzerland hmahruaipui leh mahse hun tawp dawnah Sommer chuan an lamah a ti goal palh hlauh mai, 2-2 in an inhnehtawk a, Cota Rica tan Bryan Ruiz chuan penalty a pet goal lo hlauh bawk.
Bul tan tha lo ve tho Germany angin Group Stage paltlang zawh loh hlauhthawnawm tak dinhmunah ding mahse Brazil erawh an game a tha chho tulh tulh. Group D pakhatna Brazil hian Round of 16-ah Group E pahnihna Mexico an hmachhawn anga. Group D pahnihna Switzerland chuan Round of 16-ah Group E pakhatna Sweden an hmachhawn ang.
Serbia 0-1 Brazil
(Paulinho 36', Thiago Silva 68')
PLAYER RATINGS
Serbia: Stojkovic 7, Rukavina 7, Veljkovic 6, Milenkovic 5, Kolarov 5, Matic 5, Sergej 5, Ljajic 6, Tadic 6, Mitrovic 5, Kostic 6. Subs: Zivkovic 6, Radonjic 6, Jovic 6.
Brazil: Alisson 5, Fagner 6, Miranda 6, Thiago Silva 6, Marcelo 6, Casemiro 6, Coutinho 7, Paulinho 6, Willian 6, Jesus 6, Neymar 6. Subs: Felipe Luis 6, Fernandinho 6, Rene Augisto 6.
Goal hmasa ber hi 36 mins-a lut a ni a, Coutinho ball vawrh tha tak chu Paulinho chuan box chhungah um lutin Serbia goalkeeper Vladimir Stojkovic rawn up chu pet khumin mawi takin goal a khung. Goal hnihna hi second half 68 mins-a lut a ni a, Neymar-a corner pet tha zet chu Thiago Silva chuan kawh pet pawtin a tauh goal a ni.
He match-ah hian goal hlauhawm a awm nual, Neymar chuan chance tha tak tak vawi 5 lai a nei, mahse Serbia goalkeeper Vladimir Stojkovic chuan a lo dan sak hlawm. Jesus pawhin goal khungna chance tha tak first half-ah free takin nei mahse awmze nei lovah a chhuah hlauh. Inhliam avangin first half minite 10 an khel tling vel chiah tihin Marcelo lakchhuah a ni a, Filipe Luis chuan rawn thlakin; ani hian goal kha a khung teuh hle bawk a, box pawn atanga a shot tha zet chu Serbia goalkeeper Vladimir Stojkovic chuan a lo save sak.
Second half tir lamah Serbia hian na takin an nawr ve, goal hlauhawm pawh an nei nual, Aleksandar Mitrovic-a tauh tha zet Roma goalkeeper Alisson Becker-a lo dan kha chu pui tak a ni. Second half tir lam Serbia khel tha hle mahse corner atanga goal an chhuah leh tak hnuah erawh game-a thuneihna chang chhunzawmtu chu Brazil an ni leh ta tho a.
He match-ah hian Brazil chuan ball posessions 55% an nei a, shots vawi 11 neiin; heng zinga vawi 6 te chu goal zawna kal. Serbia hian chance an insiam hleithei lo, shots vawi 7 neiin; heng zinga vawi 1 chu Brazil goal zawnah a kal. He match-a man of the match chu Coutinho a ni a, khel tha tluan zak lo mahse goal a assist bakah chance a siam nual. Neymar hi Brazil superstar ni mahse Coutinho hi Group Stage-a Brazil innghahna a ni kan ti thei ang.
An game hmasa berah hnehna an chang zo lo, hei vang hian Brazil team chuan beisei an phak lo hle niin mipui lamin an ngai. Mahse an khel tha chho tulh tulh, an hmatawngte an tha em em a, an attacking pawh a hmuhnawm. Serbia an hmachhawn tum hian goal hnih aia tam khung thei dinhmunah an ding. Round sang zawkah pawh an chetthat chhoh zel beisei a ni.