10 Sep 2019 10:59

inkhel

Griezmann duhthusam chu Messi leh Suarez bula khelh: Costa

Diego Costa chuan Antoine Griezmann kha chhuak lo tura thlem zui zel a tum loh thu sawiin, Messi leh Suarez te bula khelh kha a duhthusam a nih thu a sawi.

Season liam taah khan Antoine Griezmann chuan Atletico Madrid tan goal 21 a thun thei a, kumin July thlaah khan a khelhna club chu chhuahsanin FC Barcelona chu £108 million zetin a zawm a ni.

Diego Simeone kaihhruaina hnuaiah Costa chu Griezmann nen tlar hma lamah an inkawp thin a, season khat leh a chanve chhung chu an khel dun hman a. Griezmann-a’n an club a chhuahsan chu a tifuh hle nia a hriat thu a sawi chhuak.

Costa chuan, “Antoine Griezmann khan Lionel Messi leh Luis Suarez te bula khelh tluka chak a nei lo a, kha kha a duhthusam ber chu a ni,” a ti.

“Eng ang player nge a nih tih chu kan hre tlang vek a. Footballer te chuan thil thar tih chhin kan duh fo thin a, chona thar hmachhawn te, hmun danga kan vanneihna en chhin te hi kan duh thin a. Griezmann pawh khan club lian Barcelona te angah Atletico-a a pawimawh ang khan player pawimawh a nih theih leh theih loh a hre duh a ni,” a ti bawk.

A sawi zelnaah, “Khawvel thar dai a duh a, chutiang chu Barcelona-ah chuan a tawng ngei dawn a. Chhuah kha a tum nghet bawk a, kan hnena awm zui zel tur khan thlem ka tum lo hrim hrim a. Ka ngaihdan kha min zawt ta se, tu te pawhin thil thar tih chhin chu kan tum theuh tur a ni tiin ka sawi ngei ka ring,” a ti.

2014 kumah khan Diego Costa pawh hian Atletico Madrid chhuahsanin Chelsea a zawm a, Stamford Bridge-ah hian Jose Mourinho hnuaiah leh Antonio Conte hnuaiah a khel hman a, Premier League title pahnih chu a la hman a. Antonio Conte nen an inkar boruak a fuh lo chho a, January 2018 ah khan Chelsea chu chhuahsanin Atletico Madrid lamah a kir leh a ni.