Nizan Champions League-ah Atletico Madrid-in an mikhual Bayern Munich 1-0 in an hneh a, Atletico hian minute 34-naah Carrasco goal hmangin 1-0 in hma an hruai a,hemi hnu fe minute 84-naah penalty an hmu leh. Hei hi Atletico striker Antoine Griezmann chuan a pet a, goal kham pet perin a goal lo a, a tawpah erawh Ferreira Carrasco-a goal hmangin Atletico hi 1-0 in an chak tho a ni.

Atletico hian Champions League a an game hnuhnung paliah penalty vawi thum an hlawhchhuak a, vawi khatmah an pet goal lo. Vawi thuma vawi hnih hi Griezmann pet a ni. Penalty-ah hian vanduai viau mahse an coach Simeone chuan Griezmann a la ring tawk a, penalty an hmu leh a nih pawhin a la pet tur thu a sawi.

Simeone chuan, "[Diego] Maradona, [Lionel] Messi, [Michel] Platini leh Zico te pawhin penalty hi an pet goal vek bik lo. Griezmann hian a la pet zel ang." tiin a sawi a.

Sawi chhunzawmin, "A hnathawh zawng zawngah hian kan lawm hle a, goal kan khung theihna tura counter attack kha ama bul tan a ni a, hei chauh lo pawh thil tam tak a ti bawk. Ka tan chuan khawvela forward tha ber te zing a mi a ni." tiin a sawi a ni.