15 May 2019 09:26

bakteaJr.

Mizo tlangval

​Griezmann a chhuak dawn

Atletico Madrid star player Antoine Griezmann chuan tun nipui hunah Atletico Madrid a chhuahsan tur thu club website kal tlangin a puang.

Atletico Madrid website-ah Greizmann chuan thlahna thu sawiin, “Kum nga ropui tak ka hmanga, engkim avangin thinlung takin lawmthu ka sawi a ni,” a ti.

Nikum atang tawh khan Barcelona leh Griezmann-te hi sawizawm an ni tawh a, tun nipui hunah Barcelona hian Greizmann-a release-clause pound maktaduai 108 zet chu an pe tla dawn niin Sky Sports chuan a tarlang.

Greizmann hian kum 2014 khan Real Sociedad atangin Atletico hi a zawm a, Atletico-a kum nga a awm chhungin Greizmann hian Spanish club hi Europa League, UEFA Super leh Supercopa de Espana-te chu vawi khat theuh a chawipui.

Tun season-ah erawh Atletico hian trophy chawi an nei dawn lova, La Liga lamah pawh pahnihna niin season an khar dawn.

Nikum nipui lai khan sawilan tawh angin Greizmann hi a chhuak teuh viau a, mahse Atletico –a a la cham tur thu sawiin a cham zui. Tunah erawh a chhuahsan ngei dawn a, a kalna tur hi sawi lem lo mahse Barcelona a nih ngei a rinawm.

Atletico hian an player rinrawl ber pahnih an chan dawn a, Greizmann bakah hian an captain Diego Godin chuan Atletico hi tun nipuiah a chhuahsan ngei tur thu a lo sawi ve tawh bawka, ani hian Inter Milan a pan a rinawm a ni.