Barcelona player thar Antoine Griezmann chuan Arsenal striker Alexandre Lacazette chu a khelhpui chak thu a sawi.

Kum 28 mi Lacazette hi Lyon academy chhuak a ni a, kum 2017 thleng Lyon tana khelin, Arsenal hian an lei a, Arsenal-ah hian Pierre-Emerick Aubameyang nen inkawp fuh hle in an khel a mawi thin viau.

Griezmann chuan France lama a khelhpui thin Lacazette-a chungchang sawiin, “Player ka nihna zawnah Alexandre Lacazette hi khelhpui ka chak a, khelmual pawnah ka thian tha tak niin national team lamah kan khel dun a, talent a nei tha hle a ni,” a ti.

Lacazette hi Arsenal Player of the Year-a thlan a ni a, tun nipui bazar inhawn tirh khan Barcelona nen hian sawizawm a ni a, mahse eng mah a thleng zui lo.

Lacazette leh Barca technical secretary Eric Abidal-te hi an inhre tha viaua, Lacazette hian Barcelona nena sawizawm a ni chu a lawmawm a tih thu a lo sawi tawh nghe nghe.

Barca striker kawl lai Luis Suarez chu a upa chho ve tan tawh nen Barca hian Lacazette hi nakkum lamah an dawr leh lovang tih a sawi theih lova, Lacazette pawh hian Arsenal atanga Barca-a insuan hi a hreh a rinawm lem loh hle.

Greizmann hian sawi zelin, Manchester United chu a hma in a zawm teuh tawh thu a sawi a, “Manchester United kha ka zawm teuh hle a, mahse kha tih lai khan ka khelhna hmunah ka hlim em a ni. La Liga-ah hian hun nuam tak ka hmanga, Premier League-in a neih loh kan nei a, chu chu ni (sun) a ni.

“Premier League-ah hian a team ang zawng chuan Liverpool hi an supporter-te avang hian ka ngaina a, engtikah emaw Premier League title an lak ka beiseipui a ni,” a ti bawk.