Ole Gunnar Solskjaer chuan Mason Greenwood chu Robin van Persie nen khan inang a tih thu sawiin, tun aia nasa zawka hma sawn thei tura tan a lak erawh a ngaih thu a sawi.

Mason Greenwood chuan 2019-20 season tir atangin boruak a nei fuh chho angreng hle a, inelna hrang hrangah vawi 12 a khel tawh a, hengah hian goal 3 chu a thun tawh a ni.

Manchester United forward pahnih Marcus Rashford leh Anthony Martial te an la awm ve bawk avangin kum 18-a upa Mason Greenwood tan chuan khelhna hmun chan hnem a la harsa rih a, hei vang tak hian tun aia nasa zawka hma a sawn theih an duhpui hle.

Nilaithawhtanah khan Europa League-ah Manchester United chuan Partizan Belgrade chu 3-0 in an hneh a, an goal hmasa ber hi Mason Greenwood thun a ni nghe nghe a. An chak takah chuan United hian knockout stage an thlen theih phah a ni.

Solskjaer chuan, “Mason Greenwood hi a finishing a tha reuh riau a, a tan chuan thil harsa pawh a ni meuh lo a. Ke dinglam leh ke veilam a hmang thiam ve ve a, khawi zawk hi nge a hman thiam zawk tih pawh amah ber hian a sawi chiang thei lo hial ang,” a ti.

“A khelh dan te, a thiam dan te hi Robin van Persie nen khan an inang hlein ka hria a. Defender te tan pawh duh anga ven a harsa thei hlein a rinawm a, training na velah te hian a finishing hi a zir nasa thei viau bawk a. Ni tin goal thun hi a zir ziah tih hi ka mit ngeiin ka hmu thin a ni,” a ti bawk.

A sawi zelnaah, “Old Trafford-a mipui khat vek hmaah pawh tha takin a khel thei a, goal pawh a thun thei a. Mipui an tam avangin a buai phah lo a, a zam phah miah lo a, pangngai takin a khel thei zel tho a, hei hi thil tha tak a ni,” a ti.

“A mamawh chu tun aia tha zawk nih tum hi a ni a, hma la sawn belh zel thei se a tan a fuh ber ang. Nikum lawkah Under-18 lamah a la awm a, puitling huanga chet dan a zir a ngai a. Tunah chuan first team ho training a zawm ve ziah tawh a, hei hi a la tangkaipui ngei dawn a ni,” tiin Solskjaer chuan a sawi.

Ole Gunnar chuan Greenwood chu Old Trafford-ah hmabak duhawm tak nei nia a sawi rualin, first team lamah nghet taka awm thei tur chuan hun a la duh deuh dawn nia a ngaih thu a sawi bawk a ni.