Manchester United leh Getafe te chuan Mason Greenwood-a chungchang an sawi ho dawn niin The Athletic chuan a tarlang.

Getafe hian a ngheta lei duh mah se, United lam hian a man an chhiar hniam dawn lo a, hei vang hian Spanish club hian loan bawka Greenwood kawl chhunzawm an duh nia report a ni.

Kum 22 mi hian nikum nipui bazar inkhar dawnah khan loan-in Getafe a zawm a, Spanish club tan a khel tha hle, tun season chhungin competition hrang hrangah game 32 a khel tawh a, goal 10 khung tawhin, assist vawi 6 a nei ve tawh.

Greenwood hian Old Trafford-ah kum 2025 thleng contract a la nei, club lian thenkhatin an ngaihven mek nia report a ni a, lei duh an awm chuan United hian hralh mai pawh an hnial lo niin The Athletic chuan a tarlang.

Hetih lai hian an chhiarna zata lei ngam an awm lo a nih erawh chuan, loan-a chhuahtir leh mai chu an tihtheih tawk a ni leh dawn. Hei vang hian Getafe chuan season thar lamah pawh an hnena cham chhunzawm zel turin Greenwood hi an duh a, United hnenah dilna an thlen nia tarlan a ni.