Newcastle United chuan kum thar January thlaa transfer window inhawn hunah Arsenal atangin loan-a Granit Xhaka lak theih an duh.

Switzerland midfielder Granit Xhaka chu Arsenal-ah a tla na lo sawt hle a, hei vang hian kum tharah chuan hmun dang a pan mai a rinawm chho hle a. Hetiang boruak karah hian Newcastle United chuan Xhaka hi Premier League huanga awm zui zel theihna hun tha siamsak an inhuam a ni.

Serie A club AC Milan chu Granit Xhaka nen hian a hma daih atangin an lo sawi zawm tawh a. Tun hnaia thu thang thenkhatah phei chuan Xhaka hian Italy ramah in a zawng niin an sawi a, hetiang a nih chuan Milan hi a zawm mai pawh a rinawm theih phah a ni.

Arsenal captain nihna an hlihsak hnuah khan Xhaka hi Gunners tan a la inkhel leh miah lo a, hetiang boruak a neih chhoh chhan chu Crystal Palace nen 2-2 a an inhnehtawk tuma an club tantute mawi lo taka a tawng khum vang kha a ni.

Kum 27-a upa Xhaka hian mawi lo taka a chet avangin ngaihdam chu dil tawh tho mah se Arsenal tan chuan a inlan tawh lo maithei tih an hrilh a, hei vang hian a tan chuan hmun danga khelhna tur zawn mai kha a fuh ber tura ngaih a ni.

Magpies chuan January transfer window inhawn huna player lak atana an hual hmasak ber chu Granit Xhaka hi a ni a, amah pawh hian Newcastle United in an duh a ni tih hi a hre chiang tawh a ni.

Ram tana Xhaka khelhpui, Newcastle United defender Fabian Schar chuan an club bakah an khaw nawm zia te chu Xhaka hnenah hian a lo sawi nual tawh niin an sawi a, a thianpa chu an hnena kal turin a thlem tan a ni.

Steve Bruce chuan central midfield lam thawm that a duh a, hetiang tur hian Xhaka chu an tan player pawimawh tak ni thei tura a ngaih thu a sawi.