17 Mar 2020 05:33

inkhel

Grand Slam title lak zatah ka buai lo: Rafael Nadal

Rafael Nadal chuan Grand Slam title a lak tawh zat chu a dah pawimawh loh thu sawiin, a khelh leh tura chak zel chu a dah hmasa ber tih a sawi.

World No. 1 Rafael Nadal chuan Grand Slam title vawi 19 a la tawh a, vawi 20 lak tumin hma a la chho mek a. A elpui Roger Federer chu title pakhat chiahin a la tluk lo a, a elpui pakhat Novak Djokovic aiin title 3 in a chungnung mek bawk a ni.

Nikumah khan US Open title a la a, hei vang hian Roger Federer chu pakhat chiahin a um pha lo a. Tun hnaiah khan title 20 lak chungchang a ngaihtuah ngai leh ngai loh an zawt a, hetah hian chuti taka Grand Slam title lak zat a buaipui loh thu a sawi chhuak.

Nadal chuan, “Grand Slam title 20 ka la thei a nih chuan a lawmawm hle ang a, 21 ka lak theih phei chuan a tha hlei hlei ang a. Ka vanglaiin title 19 bak ka la thei lo a nih tak leh ka lung a awi tawk hle ang,” a ti.

“A tir atanga tun thlenga ka tih tawh chinah lawmna tur ka nei hnem em em mai a. Tuna ka ngaihtuah ber leh ka ngaihpawimawh ber chu naktuka ka practice tur te hi a ni a. Ka inkhelh zui zel tur chu ka dah pawimawh hmasa ber zel,” a ti bawk.

A sawi zelnaah, “Dinhmun sang tak thlen theih zel hi ka duh dan a ni a, chumi thleng thei tur chuan eng nge ka tih theih tur tih hi ka ngaihtuah thin a. Inkhelh chhunzawm zel theih ka duh ber a, ka hmaa ding leh tur chu engtin nge ka hmachhawn ang tih ngaihtuahna ka nei lian ber thin,” a ti.

“Ka sawi tawh angin Grand Slam title lak zat hi ka buaina a ni lo a, 20 a ni emaw, 15 a ni emaw, 16 a ni emaw, tha taka ka khelh theih zel tluka pawimawh a awm lo a ni,” tiin Nadal chuan a sawi.

Rafael Nadal hian Australian Open title vawi 1 la tawhin, French Open title vawi 12 a la tawh a, Wimbledon title vawi 2 a lak tawh bakah US Open title vawi 4 a la tawh a ni.