Maria Sharapova chuan tennis khawvel a rawn luhchilh leh hnuah Grand Slam title dang beisei zel a tum thu a sawi.

World No. 1 hlui Maria hi damdawi hman phal loh hman vangin thla 15 zet an hrem a, nikum khan a rawn kir leh tan a, title tenau deuh hlek aiin title lian ho chu lak ngei tuma beih a tum thu a sawi a ni.

Kum 31-a upa Sharapova hi test a paltlang zawh loh atanga thla 15 hnuah nikum April thlaa Stuttgart Grand Prix ah a inlan leh tan a, a rawn kir leh hnu hian title pakhat, Tianjin Open title a la leh tawh a, kuminah Stuttgart-ah a rawn tel leh a, Caroline Garcia nen first round match an khel ang.

Russian tennis star Sharapova chuan, “Grand Slam title lo lak tawh thin chuan title tenau deuh hian rilru a luah thei meuh lo chu a nih hi. Grand Slam chu rilruin a tinzawn nghal run mai a ni,” a ti.

“Kumin chhungin tournament tenau deuha champion ka tum tih sawi ila a atthlak viau ang a. A sang thei ang ber puitlin tum hi a tha a, chutiang chuan tih ngei pawh ka tum nghet tlat a ni,” a ti bawk.

2014 khan Sharapova hian Grand Slam title a lak hnuhnun ber chu a tawng a, tennis chawlhsan chu a la tum loh thu a sawi a, chawlh lampang chu a rilruah a la awm loh thu a sawi.

“Chawlh chungchang hi chu ka la ngaihtuah lem lo a, engtikah emaw chawlh chu a la ngai ngei dawn a, keima remruatna thlapa chawlh hun siam fel ka duh a ni,” a ti a.

“Ka chawlh hma ngeiin Olympics khelh leh phawt hi ka duhthusam a ni a, amaherawhchu puitlin a nih dawn leh dawn loh sawi a harsa tawh viau a. Ka tih theih awm chhun chu hma lam pana kal zel a ni a, rim takin ka inpuahchah ang a, chu chuan khawi nge min thlenpui tih kan hre zel dawn nia,” a ti bawk.