15 May 2020 05:06

inkhel

Grand Slam title la hnem ber ka ni thei ang: Djokovic

Novak Djokovic chuan Grand Slam title la hnem ber record a siam theih a rin thu sawiin, World No. 1 ni rei thei ber nih a tum thu a sawi.

Kum 32-a upa Novak Djokovic chu tunah hian World No. 1 a ni mek a, tun dinhmunah Grand Slam title 17 a la tawh a, Rafael Nadal aiin vawi 2 in a la tlem a, Roger Federer aiin vawi 3 in a la tlem bawk a ni.

Djokovic chuan tennis huang chhunga ‘Big Three’ te chu Grand Slam title lak lamah hian an inthlau tawh lo hle tih sawiin, a chunga awm pahnihte chu a lehpelh theih ngei a rin thu a sawi chhuak.

“Keimah hi ka inringtawk thei hle a, ka thil tih reng rengah hian mahni inrintawkna hi ka nei tha viau thin a. Grand Slam title la hnem ber record hi ka siam theih ngei ka ring a, chu bakah World No. 1 ni rei thei ber ka nih theih pawh ka ring a. Chutiang chu puitlin thei ngei hi ka tum ber chu a ni,” tiin Djokovic chuan a sawi.

Kumin March thla tir lama coronavirus vanga inkhelh chawlhsan a nih hma khan Djokovic hi a che tha chho hle a. Serbia chu ATP Cup a lakpui a, a vawi 8-na atan Australian Open title a lak bakah Dubai Tennis Championship title lain, he title hi vawi 5 a la tling tawh a, hneh loh nei loin match 21 chu a kal tluang mek a ni.

Swiss superstar Roger Federer chu Grand Slam title la hnem ber a nih mek bakah World No. 1 ni rei thei ber record chelhtu a ni bawk a. Federer hi kar 310 chhung chu World No. 1 ni thei a ni a, a zawnin kar 237 chhung chu he dinhmunah hian a ding thei bawk a. Novak Djokovic chu kar 282 chhung World No. 1 hi a ni tawh a, a zawnin kar 122 chhung a ni thei bawk a ni.

Kumin August thlaah hian Federer chu kum 39 a tling tawh dawn a, Djokovic chuan ama dinhmun a thlirin kum 40 a tlin thlenga inkhelh theih a inrin thu a sawi a ni.