Rafael Nadal chuan tennis khawvela hlawhtlin belh zel a la duh thu sawiin, inkhel a chawlhsan hmain Grand Slam title 25 lak hman a duh thu a sawi.
World No. 2 Rafael Nadal chuan coronavirus vanga inkhelh theih a nih loh lai chuan thil dang chi hrang hrang a tih thin thu sawiin, tun hnaiah chuan ei siam nuam a tih thu a sawi a. Tui lampang sa a ngainat thu sawiin, lockdown lai chuan hetiang lampang hi a ei nasa hle niin a sawi a ni.
BBC Sport aiawhin Sue Barker chuan Rafael Nadal hi a kawm a, heta an inkawmnaah hian inkhelh tihtawp laia a thil tih thin leh a ei tur duh zual leh ei nasat deuh te a sawi chhuak a. Inkhelh zui zel a la tum hle a, title pawh a tam thei ang ber lak zel a duh thu a sawi bawk.
Sue Barker chuan Nadal chu Roger Federer-a record khum tumna a neih leh neih loh a zawt a, Spanish star chuan inngaitlawm tak chungin he zawhna hi a chhang a ni.
Nadal chuan, “Vawi tam tak ka lo sawi tawh thin a, ka title lak zatah hian ka buai ngai lo khawp mai a. Kalphung nghet ka nei a, chutiang chu kalpui zel pawh ka la tum a. Kum hei leh chen ka lo kal tawhna ka thlir kir hian ka lawm tawk em em tawh a ni,” a ti.
“Tun dinhmun ka thlen theih dan ka chhut hian lawmawm ka ti hle a, vawi 20 champion theih leh theih loh lampang hi min tibuaitu chu a ni lo viau a. Novak Djokovic hian kei aiin title a la hnem zawk thei a, ka hmaa awm chu theihtawp chhuaha pal tlang ka tum mai thin,” a ti bawk.
A sawi zelnaah, “Tennis hi nuam ti taka khelh zel hi ka tum ber a ni a. Inkhel ka chawlhsan hma hian Grand Slam title 25 lak theih te chu ka duh a, ka theih dawn leh dawn loh erawh ka hre bik lo,” a ti.
“Kum eng emaw zat chu ka la inkhelh zui zel theih ka beisei a, ka hmaah hian eng thil nge rawn awm dawn ka hre lo a. Eng pawh hmachhawn dawn ila, theihtawp chhuah chunga pal tlang theih zel hi ka tum ang,” tiin Nadal chuan a sawi.
Kumin September thlaah hian Rafael Nadal chuan Roland Garros-ah a title humhim a tum dawn a, a humhim thei a nih chuan Grand Slam title pakhat chu a neih belh leh dawn tihna a ni ang a. August thlaa US Open ah erawh Spanish star hi a tel thei dawn leh dawn loh a la sawi theih loh a ni.