Grand Slam of Darts, Wolverhampton-a khelhah Gary Anderson leh Wesley Harms-te intumin, Anderson hian 10-2 in hnehna a changa quarter final a lut.

Kum 34 mi Harms chuan a chak loh chhan sawi fiahin, Anderson chu a vawih uih hle niin a sawi a, Anderson hian a pha ve nghal bawk. Harms chuan Anderson-a vawih uih zia sawiin, “Zan hnih chhung he rim hian ka hnar a kiansan nan ka mamawh ang” a ti hial.

World no.4, kum 47 mi Anderson chuan Harms a puhna hi chhang letin, “Harms hian ka vawihah a ngai a nih chuan 1,010% in a hre sual chiang hle a ni. Ka fate nunna chhalin thiam lohna engmah ka nei lo tih ka sawi ngam,” a ti.

Anderson chuan sawi zelin, “A hmain stage-ah ka pum a nuam lo tawh a mahse tlang takin chu chu ka sawi maia, ka vawih a nih chuan dawt ka sawi dawn lo. Ka kal apiang khan artui tawih rim hi boruakah a rawn nam leh hak zela, Harms-a kha a vawih emaw ka ti zawk.

A uih em em a, chuan khami hnu lawk khan a rawn khel tha zo bawk nen, inpaih thawl a mamawh a nih ka ring mai. Khatianga thil ti an awm a nih chuan daktawr an hmuh ngei a ngaia, Harms khan vawihah min puh a, keimah ka nih phawt chuan ka zep lovang,” a ti.