Grand Slam 24 la thei G.O.A.T Novak

11th September 2023, 12:09PM

Thawhtanni zing khan New York-ah US Open Final khelh a ni a, Novak Djokovic chuan  6-3 7-6 (7-5) 6-3 in Daniil Medvedev hnehin, a vawi 24 nan Serbian star hian Grand Slam title 24 a la ta a ni.

Kum 36 mi hian final-ah hian rokhawlhna lian a tawk lem lo, set hnihnaah hliam tenau a nei a, mahse a straight ta tho a ni. An inkhelh chhung hi darkar khat leh minute 44 a ni a, mipa lamah chuan Novak a chungnung hle, hetih lai hian hmeichhe lama record nei tha Margaret Court-i Grand Slam lak zat a nihrual ta chiah a ni.

Tun hmain hmeichhe lam record hi sawi lan a ni ngai lo a, Federer leh Nadal te kha an chungnung ngawih ngawih. Novak Djokovic a rawn lang a, mipa lamah record thar a rawn siam hnuah Margaret-i record hi media ten an rawn thar thawh leh chauh mai mai a. Mipa leh hmeichhia hi chu khaikhin chi a ni lo tih erawh kan hriat vek kha.

"Ka tan chuan a va han hlu tak em! Sports-a level sang ber thlen hi ka naupan laia ka suangtuahna a ni thin. Kum hnih khat liamta kha chuan vawiin hun hi ka thlen phak ka beisei lo reng reng. Mahse record siam thei dinhmunah ka ding tih ka inhria a, chumi ti tur chuan theihtawp ka chhuah ta a ni," tiin Djokovic chuan a sawi.

Covid vaccine a lak duh loh avangin tournament khelh theih loh a nei teuh, nikum lamah pawh khan US Open a khel thei lo, Australian Open-ah pawh khan misual treat ang hial khan airport lamah khan an buaipui a nih kha. 

Mahse Covid a reh a, kumin Australian Open-ah khan champion-in Nadal-a Grand Slam records a khum a. Kumin chhungin Grand Slam final a lut kim vek a, Wimbledon chiah a la lo. World rankings-ah pawh November thla chawhma lam thleng chu World Number 1 a ni thei dawn niin a lang.

Kumin chhungin Tournament lian vawi 7 khelin, vawi 4 a champion ta a, Australian Open, French Open, US Open leh Cincinnati-ah te a champion a. Wimbledon-ah pahnihna a ni a, Rome Masters-ah quarter final a thleng a, Monte Carlo-ah third round a thleng bawk.

September thla laihawl a ni mek, kum a tawp chho mai dawn. Shanghai Masters khelh hmabak a la nei a, kum 2019 hnuah a vawi khat nan a inlan leh dawn niin a lang. Tin, Paris Masters leh Tour Final te pawh khelh hmabak a la awm bawk.

Kum 36 mi hian Grand Slam vawi 24 a la ta a, amah hnaih bertu chu Rafael Nadal niin, Spanish star hian vawi 22 a la tawh a. Federer khan Grand Slam title 20 a la bawk a. Hrisel taka a la khel chho zel thei a nih chuan, nakkum lamah pawh Grand Slam title pahnih khat tal chu a lak leh a rinawm bawk a. Hmeichhe record an sawi ve ziah pawh harsatna nei lem loin a khum mai dawn niin a lang.

Tunah hian Tennis chawlhsan ta daih pawh ni se, khawvelin Tennis G.O.A.T a ni kan ti vek thei tawh ngei ang. Record reng reng hi khum tura siam a ni an ti thin, hei hi a dik khawp mai. Hetih lai hian Novak-a record hi chu khum a har ve phian dawn a ni.

Copyright © inkhel.com 2025. All rights reserved.