07 Dec 2018 12:55

inkhel

​Gomez-a ke ruh a khi

Liverpool defender Joe Gomez chu Burnley nen an intum tumun a inhliama, lakchhuak niin, a hlaim hi endik nghal a ni a, a ke veilam ruh khiin, kar ruk tal a chawlh a ngai dawn.

Turf Moor-a Liverpool-in Burnley an lukhung tum hian Gomez hi minute 23-naah lakchhuah a ni a, Ben Mee-a’n a kherh thluk avangin a inhliam. Burnley hian tharum an ngah hle a, Liverpool manager Jurgen Klopp pawh lungawi lo hle in, Burnley boss Sean Dyche nen pawh an inhmuthiam lo lek lek nghe nghe.

Gomez hi a tlem berah game sawm vel chu a awl a ngai dawn niin a langa, fixture tam vanglai taka an defender pawimawh tak a inhliam chu Liverpool hian an tuar nge tuar lo chu kan hmu dawn. Liverpool hian Champions League-ah Napoli an hmachhawn dawn a, chak ngei ngei an ngai a, Premier League lamah an umphak loh awmchhun Manchester City hmachhawn dawn bawkin, Manchester United leh Arsenal-te pawh an hmachhawn chho dawn a, Gomez chuan heng game pawimawh hi a khel thei lo vek dawn niin a lang.

Gomez hi tun season-ah Liverpool tan a tangkaiin a pawimawh hle a, Klopp-a player hman rim ber zinga mi a ni. Centre back-ah Virgil Van Dijk nen an kawp fuh hle a, Dejan Lovren leh Joel Matip-te chu bench lamah an awm fo phah a ni.