Kan hriat tawh theuh angin Premier League inkhela Tottenham leh Everton-te inkhelh tumin Everton midfielder Andre Gomes chuan a ngal ruh a titliaka, hlawhtling taka zai ni tawhin, tun season-ah Gomes hi kan hmuh hmel tawh loh.

Gomes-a inhliam dan hi Heung-min Son-a’n a kherh thluk atanga intan a tih loh theih lova, Gomes a kherh thluk avang hian Son hi direct-red card pek ni mahse chiang zawk enin, a lan danah Son hian Gomes-a ngal ruh a titliak lova, Gomes rawn chilh zuitu Serge Aurier zawk niin a lang.

Son hi a red card hmuh sut sak leh a ni tawha, Gomes a tihtluk hian a inthiam loh zia chu khelmual chhungah pawh kan hmu a, South Korean forward hi a tap tawp thei lo a nih kha.

Champions League inkhelah Tottenham chuan Red Star Belgrade chu si li fai laiin an hneha, he inkhelah hian Son hian goal hnih a khung nghe nghe.

Red Star Belgrade an hneh zawhin Son chuan BT Sport-in an kawmnaah thupha a chawi a, a tan hun harsa tak a nih thu a sawi bawk. Son chuan, “Tun hnai hi ka tan chuan hun harsa tak a ni a, mahse fan-te leh ka team-mate te atangin ‘support’ na ka hmu tha em em a, ka lawm hle.

“Thil thleng avang khan ka inthiam lova, thupha pawh ka chawi takzet a, mahse ka team-ah rilru ka pek a ngai a, hmalam ka pan zel ngai a, min thlawptu te zawng zawng hi tha taka chhan let ka ba a ni,” a ti.