Welterweight atanga kai chho Brook chuan middleweight champion Gennady Golovkin hneh a tumna chu round nganaah a tawp. Brook hian a mit dinglamah hliam a tuar avangin a trainer chuan round nganaah towel var a vawmlut a, inhnek a tawp zui.

Welterweight champion Brook hian inhnek tan a nih atangin a hneh lo nghal hle a, knockout specialist GGG hian mi hlauhawm a nihzia a lantir a round nga an khelh meuh chuan Brook hian amah inveng turin theihna a nei tawh meuh lo a ni. Brook hian hneh lo zawk mahse GGG tum tur hian a tha tawk a ni tih lantirin a theih ang angin a bei let ve bawk. GGG-a'n Brook a hneh hi mi 36 a hnehna niin hengah hian knockout 32 a nei a ni.

Round khatna an tan chiah a Golovkin hian a nawr nghal a. Golovkin hian a lu aiin a taksaah a hnek nasa a, an inkar zau tur chu siamrem zelin Brook hi a nawr bet a. Hun remchang a hmuh apiangin a lu a tum nghal bawk. Round khatna a zo a, round hnihna an tan leh chiah a a ngai ang bawkin Brook-a chan a chhe nghal a Golovkin zawkin hun remchang a nei a, a dinglama a hnek hnuah uppercut-in a chhunzawm nghal a Brook hnar a thi nghal. Hemi hnu hian Brook hian a mit a nuai zeuh zeuh a.

Round thumnaah pawh Brook a chungnung thei chuang lo. Round thumna tan a nih atanga reiloteah a tlu. Brook hian GGG tum turin a tha ve tawk a ni tih lantirin a bei chhunzawm leh a. Brook hian a mit vangin harsatna a tawk nasa tual tual a round ngana an khelh meuh chuan GGG hian a kilah nawrin a hnek siah siah mai a, Brook a inveng hleithei tawh lo a, a trainer chuan a sir atangin towel var rawn vaiin a vawmlut a, inhnek a tawp zui ve bawk.

Inhnek a zawh hian Brook hi a mit chhia vangin hospital-ah hruai nghal a ni a surgery-te tih zawh a nih hnuin a chhuak lehnghal a ni.

Manchester United striker Ibrahimovic pawhin a hmunah a en ve e.