Golden State Warriors chuan Cleveland Cavaliers hnehin a zawnin NBA title an la ta.
NBA Finals Game 4 an khel a, NBA champion lai Warriors hi 108-85 in an chak a, series chu 4-0 a lain an title kawl lai an humhim a ni.
Stephen Curry chuan point 37 a score a, Kevin Durant chuan point 20 a thun a, rebound 12 lain assist 10 a nei a, NBA Finals MVP atan an thlang bawk a. Durant hian NBA a luhchilh hnuah finals triple double a neih hmasak ber a ni.
Warriors hian kum li chhungin NBA title hi vawi thum an la a. Cleveland hi Golden State nen final vawi 4 an khelh hnuhnungah an la tlawm vek a. NBA Finals-a 4-0 a chak thei hnuhnung ber chu San Antonio niin, 2007 khan Cavaliers chu 4-0 in an hneh a ni.
Golden State Warriors hian NBA title hi vawi ruk an la tling ta chiah a, Chicago Bulls nen an title lak zat hi a inzat ta chiah a, all-time list-ah anni pahnih hian pathumna dinhmun an hauh a. Warriors hian 1947 leh 1956 khan Philadelphia lama an la inkulh laiin title hi an lo la tawh a, 1962 khan San Francisco Bay lamah an insuan a, hemi hnu 1975, 2015 leh 2017 te khan title hi an la bawk a ni.
Kum li chhung chu a zawnin Golden State Warriors leh Cleveland Cavaliers te hi NBA Finals-ah hian an inhmachhawn ta a. Cavaliers star LeBron James chuan a zawnin Finals vawi 8 a khel ta chiah a, point 23 a thun a, rebound 7 lain assist 8 a nei bawk a. Finals-ah hian a record chu 3-6 a ni ta a, Miami chu title vawi 2 a lakpui a, 2016 khan Cleveland hi title a lakpui tawh bawk.
James hian Cavaliers tana a game hnuhnung ber a ni tawh maithei a, thla thar atang chuan free agent ni thut thei a ni a. A team-mate te an rin hleihtheih loh em avangin hmun dangah a chhuah a rinawm tawh hle a, a tan chuan NBA title lak theihna tur team zawn mai a finthlak viau ang.
Inkhel entute pawhin hetiang boruak hi an hre chiang bawk a, inkhel tawp dawnah James chu ‘M-V-P’ tiin an au dual dual a. 2010 khan Cleveland chhuahsanin Miami a lo pan tawh a, 2014 khan Cavaliers-ah hian a let leh a, khatiang kha a thleng lo ang tih a sawi theih loh.
An inkhelah hian a tir atangin Warriors hi an chungnung nghal a, 11-2 velin hma an hruai nghal phat a, 24-13 vel ni chhoin first quarter tawpah 34-25 in hma an hruai hman a. Half time a thlen chuan Warriors hi 61-52 in an chungnung zel a, second half-ah pawh Cavaliers hian hma an sawn vak lo.
Third quarter an khel chho a, hemi quarter bikah hian Golden State chuan 25-13 in hma an hruai a, fourth quarter-ah pawh chanchin a danglam lem lo. Hun tawp dawnah, second tlemte chauh a awm tawh a, Warriors bench lama thute chu an awm mai mai thei tawh lo, chak an lawm tan der tawh a. Hun a tawp chiah chu thawm a tha hle.
Golden State Warriors coach Steve Kerr chuan, “Tun tum chu title kan lak tawhah chuan a khirh ber tum a la ni,” tiin a sawi.
Stephen Curry pawhin, “Nikum Finals kan khelh kha kan la chhawr tangkai a ni ber a, thih tha nen an rawn tang dawn tih kan hria a, kan lo inpuahchah lawk a. Min nawr nat poh leh a chhan let lamah tan kan la ve zel a, a tawpah chuan kan dingchang ta zawk a ni,” a ti.