31 Oct 2019 05:05

inkhel

Golden State Warriors buaina a pun belh zel

Golden State Warriors chu an che fuh lo chhunzawm zel a, Phoenix Suns an hneh loh bakah he inkhelah hian Stephen Curry kut veilam ruh a tliak zui bawk a ni.

Stephen Curry chu third quarter-ah a chesual a, ball la tura a zuang chu a tlak lehna lamah a inbeng fuh lo a, a kut veilam ruh chu a tliah phah a. Golden State Warriors leh Phoenix Suns te inkhelah hian Suns chu 121-110 in a tawpah an chak a ni.

Third quarter-ah minute 8:31 a la awm tihin Stephen Curry hi a chesual a, a kut chu na a ti hle a, a chhuak zui nghal bawk a ni.

Aron Baynes chuan he inkhelah hian point 24 a score bakah rebound 12 lain, assist 7 a nei a, vawi 3 a block bawk a. Devin Booker chuan point 31 a score a, an zarah hian Phoenix Suns chu an chak theih phah a. Warriors chu Chase Center-a an home game pahnihah an chak lo ve ve a ni.

A inhliam hmain Stephen Curry chuan point 9 a score hman a, kum 31-a upa Curry an chhawr theih loh chhung chu Warriors tan a buaithlak chho ve hlein a rinawm.

Tun season chhungin Golden State Warriors hi an che fuh lo chho viau mai a, Kevin Durant chuan Brooklyn a pan daih a, Klay Thompson chu July 2 khan an zai a, a khup veilam an zai vang hian tun season chhung chu chhawr theih a nih hmel loh viau bawk a ni.

A hmain Golden State hian Chase Center-ah tho Clippers an lo hmachhawn tawh a, kha inkhelah khan Clippers chu 141-122 in an lo chak tawh bawk a ni.

Warriors tan hian a ke veilam tihnat vanga training camp lama tel ve thei ta lo, Golden State tana a vawi khat khelhna, center Willie Cauley-Stein chuan point 12 a score bakah rebound 5 a la thei a ni.