01 Aug 2019 05:36

inkhel

Gold beisei a awl, lak a har: Mary Kom

Mary Kom chuan ram aiawha a feh chhuah chang hian miin gold medal la ngei turin an beisei thin tih sawiin, gold medal la tura inbeisei chu a awlsam viau a, lak tak tak erawh a harsa hle tih a sawi.

Manipuri boxer MC Mary Kom chu 2020 Tokyo Olympic atan a inbuatsaih tan a, mi reng rengin Japan rama infiamna kutpui neih hunah hian gold medal la ngei turin an beisei deuh zel a ni.

“Kan ram tan hian theihtawp ka chhuah ang a, result tha thei ang ber neih ka tum dawn a. Mi chuan India tan gold medal la thei ngei turin min beisei a, a lawmawm viau rualin thil huphurhawm leh harsa tak a ni,” tiin Mary chuan a sawi.

“An tan chuan gold la tura min beisei hi thil awlsam em em mai a ni a, hetih lai hian ka tan ve thung chuan thil huphurhawm tak mai a ni thung a. An beiseina ang hi a taka thlentir ngei chu ka tum dawn a, hmabak erawh a khirh ve viau dawn a ni,” a ti bawk.

London Olympic bronze medallist chuan ngawrh taka inbuatsaih chhoh zel a tum thu sawiin, hmanhmawh taka chet chiam theih a nih loh thu a sawi a. Olympic-a tel thei tura tlin chu a taka tel ang chiaha pawimawh a nih thu a sawi.

Kom chuan, “Tokyo Olympic ah hian tel theih hmasak a ngai a, chutianga tling thei nih chu a pawimawh hmasa ber a. Ka tling ta a nih chuan hma ka la chho ang a, zawi muangin hma ka sawn belh ve zel ang,” a ti.

A sawi zelnaah, “Kan ramin min beiseina hi ka thlir ang a, min beisei ang tak hian awm ka tum dawn a. Keima lam atang chuan ka theihtawpin hma ka la dawn a ni,” a ti bawk.

MC Mary Kom hian tun hnaia 23rd President’s Cup ah khan 51kg category-ah gold medal a la zo chiah a ni.