Ivan Lendl chuan tunlaia mipa tennis player lar zual pathum chungchang sawiin, player ropui ber an teh dawn a nih chuan Grand Slam chu tehfunga hman a fuh ber tur thu a sawi.

Vawi 8 ngawt Grand Slam title la tawh Ivan Lendl chuan Roger Federer, Rafael Nadal leh Novak Djokovic te chu tennis player ropui tak tak vek an nih thu sawiin, a ropui ber thlang chhuak tur chuan Grand Slam title an lak zat chu tehna pawimawh ber ni tura a ngaih thu a sawi a ni.

Tun hnaiah mipa tennis player zinga ropui ber, GOAT (Greatest of all time) chungchanga inhnialna a tam hle a. Mi tam takin Roger Federer chu ropui an tih ber laiin, thenkhatin Rafael Nadal aia ropui an awm loh thu an lo sawi ve bawk a. Novak Djokovic chu Federer leh Nadal te pahnih khum thei tura ngai pawl an awm bawk a ni.

Anni pathum hian tun hnaia title lian tham 13 chu an hui hlawm a, kumin August thlaa kum 39 tling mai tur Roger Federer chu Grand Slam title la hnem ber a ni mek a, 20 a la tawh a. Rafael Nadal chuan a um pha teuh tawh hle a, 19 a la ve tawh bawk a ni.

World No. 1 ni mek Novak Djokovic chu an pathum zinga Grand Slam title la tlem ber a ni a, vawi 17 a la ve tawh a. Chutih rualin an pathum zingah chuan a naupang ber a, kum 32 mi niin, Nadal aiin kum khatin a naupang zawk a ni.

Tennis ngainatute chuan khawvela tennis player ropui ber thlang tura pawimawh an tih an sawi thin a, ngaihdan a inang lo hlawm hle a. Thenkhat chuan World No. 1 nih rei zawng chu tehfung pawimawh ber a nih thu an sawi a, title lak zawng zawng pawimawh ti an awm bawk a, Lendl anga Grand Slam title lak zat dah pawimawh ber an awm a, head-to-head record a pawimawh ber ti pawl pawh an awm bawk a ni.

Lendl chuan, “Novak, Rafa leh Roger te pathum zinga tu emaw ber hi Open-era ah chuan player tha bera thlan chhuah awm tak a ni a. GOAT hi thlan tur a nih chuan Grand Slam title an lak zat hi a tehfung pawimawh ber tur niin ka hria,” a ti.

“Tun dinhmunah chuan Roger hi Grand Slam title la hnem ber a ni mek a, chutih rualin an intlansiakna a la tawp mai lo a. Tennis khelh an chawlhsan vek hunah he intlansiakna hi a tawp dawn chauh a, chutih hunah chuan ngaihdan siam chauh chi a ni ang a, tunah chuan tlanna tur an la ngah rih viau a ni,” a ti bawk.

A sawi zelnaah, “An thlen chinah hian GOAT thlang chhuak dawn ta ila Roger hi thlan awm tak a ni ang a, chutih rualin a la tawp mai si lo a, thlan chhuah chi a la ni lo a. Novak leh Rafa te hi an la naupang deuh a, hun eng emaw chen chu an la inkhel zui zel thei dawn a, hei vang hian intlansiak chanchin ngaihnawm tak hi a la awm zel a rinawm tlat a ni,” a ti.