12 Apr 2018 09:22

inkhel

Goalkeeper hlawh hnem 5

Goalkeeper te hi team tin innghahna bulpui berte zinga mi an ni a, an pawimawh ang hu hian fak an hlawh khat viau thung. Kum tluanin che tha se, tu vak mahin an fak hluak ngai lem lo a, vawi khat an chet chhiat zeuh erawhin an sawisel sup sup zel si a. Heng avang te hian goalkeeper hi an khawngaihthlak angreng hle.

An pawimawh bawk a, goalkeeper tha chu an hlawh pawh a sang hlawm viau a. Tunlaia goalkeeper hlawh hnem zual panga han bih chiang ila.

5. Joe Hart (West Ham United)


Kum 30-a upa Joe Hart hi khawvela goalkeeper zingah hlawh hnem lamah pangana a ni mek a, West Ham United chuan Manchester City atangin an hawh mek a. Joe hian kar khatah £116,000 a hlawh mek a, hei hi India pawisa chuan Rs. 1,07,49,372 vel bawr a ni. 2006 khan Manchester City chuan Shrewsbury Town atangin an lei a, 2010-11 tan dawn khan City rinrawl ber a ni tan a. Club tan game 512 a khel tawh a, England tan 2011 atang khan vawi 75 a khel tawh bawk a. City chu Premier League title 2 a lakpui tawh bakah a zawnin Premier League Golden Glove chawimawina pawh vawi 3 a dawng tawh a ni.

4. Gianluigi Buffon (Juventus)


Italian pachal Buffon hi tunlai khawvela goalkeeper zingah chuan a tha ber tia chhaltu an thahnem hle a, a dikna chen pawh thui tak a awm ngei ang. Kum 40 tling tawh mahse a la zahpuiawm chuang lo hle a, tun season chhung ringawt pawhin game 27 khelhah goal chhuah loh hi vawi 14 a la nei a. Game 1000 chuang khel tawhin, trophy a la hnem tawh hle a, record a siam nual tawh bawk a. Tunah hian kar khatah £143,000 (Rs. 1,32,51,381) a hlawh a ni.

3. Gianluigi Donnarumma (AC Milan)


AC Milan goalkeeper Donnarumma hi Gianluigi Buffon hnung zuitu tura an ngaih a ni a, kum 19 chauh la niin Milan tan game 117 zet chu a khel tawh a. Italy tan pawh vawi 5 chu a khel tawh bawk a, tun season chhungin Milan tan game 45 khelin vawi 20 chu goal a chhuah lo a ni. Gianluigi hlawh hi kar khatah £180,000 (Rs. 1,66,80,060) a ni.

2. David de Gea (Manchester United)

Manchester United chhuanvawr David de Gea hian kar khatah £200,000 (Rs. 1,85,33,400) hlawhin, khawvela goalkeeper zinga hlawh hnem ber dawttu a ni mek a. 2011 khan Sir Alex Ferguson chuan Edwin Van Der Sar thlaktu atan Spanish tlangval hi a lalut a, mi rin a hlawh lo hle a. Kum a ral chho a, fak a hlawh tial tial a, kum thum chhung chu a zawnin Sir Matt Busby Player of the Year chawimawina a dawng a, tun hnai season thumah khan PFA Team of the Year ah pawh a tel vek a ni. Tun season chhungin game 39 khelhah goal chhuah loh vawi 20 a nei a, Premier League Golden Glove dawn beiseiawm ber pawl a ni.

1. Manuel Neuer (Bayern Munich)


Bayern Munich goalkeeper Manuel Neuer chu khawvela goalkeeper hlawh hnem ber niin, kar khat chhunga a hlawh hi £257,000 (Rs. 2,38,15,419) a ni a. Germany goalkeeper hi 2014 Ballon d’Or ranking-ah pawh pathumna hial lo ni phak a ni a, goalkeeper tan chuan hei baka thlen san hi a awm meuh lo. Tun season chhungin game 4 chauh a khel thei a, heng zinga game 3-ah hian goal a chhuah lo a ni.