Igor Stimac chuan Oman an hneh loh hnuah India team hian goal thun thei an neih that loh thu a sawi.

India chuan World Cup 2022 qualifying-ah Oman chu 0-1 in an hneh lo a, hei vang hian World Cup khelh theih chu a beiseiawm tawh lo hle a. An inkhelh zawhah hian India coach Igor Stimac chuan India team-in goal thun an harsat thei lutuk chu fuh lo a tih thu a sawi chhuak.

Coach Igor Stimac chuan, “Kan result kha a lawmawm lo khawp mai a, chak lo zawk ni mah ila Oman kha ka lawmpui a, Gulf Cup an khelh leh turah duhsakna ka hlan nghal e,” a ti.

“Kan inkhel kha chu a zia ve fu tho a, Oman khan hun tha an nei hnem zawk a, chak pawh kha an phu mah zawk a. Second half-ah kha chuan kan tha mah zawk a, theihtawp chu kan chhuah a, goal erawh kan thun thei ta lo a. Tun hnaia kan game hnuhnung pangaah kan harsatna chu thil pakhat a ni char char a, goal thun kan harsat,” a ti bawk.

A sawi zelnaah, “Goal kan thun ve pawh hian set-piece atangin a ni deuh zel mai a, hei hian goal thun thei player kan neih that lohzia a tilang chiang hle a. Hma kan sawn ve zel a, chutih rualin box chhungah kan hlauhawm tawk lo tlat hi a buaithlak,” a ti.

Stimac chuan, “Oman te kha team tha zet mai an ni a, chuti chung chuan an lakah tha takin kan khel ve thei zel a. Ka player te kha ka chhuang hle a, chutih rual chuan first half-ah khan kha ai kha chuan an che tha thei zawk ngeiin ka ring a. Inzir chho mek kan ni a, nakin zelah chuan kha aia tha khan chet theih kan tum zel dawn a ni,” a ti.

India player pawimawh pahnih Pronay Halder leh Adil Khan te chu first half chhungin inhliam vangin thlak an ngai a, hei vang hian Igor Stimac thil ruahman pawh a buai phah a ni.