Ciro Immobile chu tun season chhungin a invawrh sang hle a, Europe khawmualpuiah chuan goal thun hnem ber niin, Golden Shoe a dawng dawn a ni.

Serie A club Lazio striker Ciro Immobile hian Lionel Messi leh Cristiano Ronaldo te chu a khum a, anni bakah hian tlar hma lama hnuhma nei tha tak tak Mohamed Salah, Robert Lewandowski leh Erling Braut Haaland te pawh a khum hlawm a ni.

Kum 30-a upa Immobile hian Brescia nen an inkhelh tumin goal a thun a, Bayern Munich striker Robert Lewandowski chu a lehpel chiah a, tun season kal mekah goal 35 a thun tling tawh a. Naktukah hian Napoli nen an inkhel dawn a, goal thun belh theihna hun tha a la nei dawn a ni.

Juventus star Cristiano Ronaldo chuan goal 31 a thun tawh a, Turin khawpuiah Roma nen an inkhel dawn a, Immobile um pha thei tur chuan tun season chhunga an game hnuhnung berah hian goal a thun teuh a ngai ang.

Immobile hi Serie A huanga goal thun hnem ber a nih vawi khatna chauh a ni lem lo a, 2014 leh 2018 ah te pawh ‘Capocannoniere’ a lo dawng tawh bawk a. Italian footballer zingah chuan European Golden Show dawng thei pathumna chiah a ni dawn a, a hmain Francesco Totti (Roma, 26 goals, 2007) leh Luca Toni (Fiorentina, 31 goals, 2006) te chuan an lo dawng tawh a ni.

Napoli nen an inkhelh hunah Ciro Immobile hian goal 2 a thun a nih chuan 2015-16 season a Gonzalo Higuain record siam a lehpel thei dawn a. Higuain hian season khatah goal 36 a thun tling a, hei hi Serie A huangah chuan season khata goal thun hnem ber record ding lai niin, Immobile hian goal 2 a thun tling thei a nih chuan a vaiin goal 37 a thun tling thei dawn a ni.

Italy aiawhin Immobile hi vawi 39 a feh chhuak tawh a, hengah hian goal 10 chu a thun tawh a. Club tana a chet that angin ram tan hian a tum angin a che fuh vak lo a. Chuti chung chuan a khelh zat leh a goal thun zat en hian che chhe em em chu a ni hran lo a tih theih.

Ciro Immobile hian 2009 atang khan Juventus-ah bul a tan a, vawi thum chauh a inlan a. 2010 ah Siena chu loan in a zawm a, game 4 khelhah goal 1 a thun a, 2011 ah Grosseto chu loan in a zawm leh a, game 16 khelhah goal 1 chiah a thun bawk a. 2011-12 season-ah khan loan in Pescara a zawm a, game 37 khelhah goal 28 thunin Serie B club chu Serie A lamah a kaipui thei a ni.

2012-13 season chu Genoa lamah a khel a, game 33 khelhah goal 5 chiah a thun thei a. 2013-14 ah khan Torino a zawm leh a, hetah hian game 33 khelhah goal 22 zet a thun thei a. A che tha chho deuh bawk a, Borussia Dortmund chuan 2014-15 ah khan an la a, game 24 khelhah goal 3 chiah a thun a ni.

2015 ah khan Sevilla chu loan in a zawm a, game 8 khelhah goal 2 chu a thun a. 2016 ah Torino chu loan bawkin a zawm leh a, game 14 khelhah goal 5 chu a thun a. He mi hnuah hian Lazio a zawm a, tun thlengin game 141 a khel tawh a, hengah hian goal 102 zet chu a thun tawh a ni.

Tun season chhunga Lazio in league goal 78 an thun zinga a chanve deuh thaw chu Ciro Immobile thun hi niin, penalty spot atangin goal 14 chu a thun tawh a. Lazio game hnuhnung 4 ah pawh goal 6 zet chu a thun thei a ni.