Sunday zan khan Manchester United chuan Goodison Park-ah Everton chu Premier League inkhelah si thum faiin an hneh a, he inkhelah hian Alejandro Garnacho chuan goal mawi tak a khung.

Inkhel an tan a, minute thum an khelh pum hmain box pawn dinglam atanga Diogo Dalot-a ball cross chu Argentine forward Garnacho chuan mawi takin goal-ah a back volley lut a, United manager Erik ten Hag chuan he goal hi Goal of the Season ni thei tur khawpa mawi a nih thu a sawi.

Garnacho bakah hian Marcus Rashford leh Anthony Martial te chuan goal khat ve ve Everton lakah hian an khung bawk a, United hian harsatna liantham tawk lovin khual mualah point 3 hlu tak an hlawhchhuak a ni.

Garnacho-a goal chungchang sawiin Ten Hag chuan, “Goal mawi tak a ni a, game khelh tur la tam hle mah se, Goal of the Season kan hmu der tawh maithei,” tiin a sawi.

Dutch manager hian inkhel a hmuhdan sawi bawkin, “Kan khel tha hle a, bul kan tan tha em em a, kan tum ang takin bul kan tan a, goal mawi tak kan khung. Kan goal kha finishing tha tak a ni a mah se kan siam chhuah dan khan min ti lawm zual.

“First half-ah khan duh aiin kan khel awlsam mah mah a, kha kha kan inkhela ka duh loh lai a ni a, Everton khan chance an neih phah bawk. Second half-ah erawh kan khel a nung tha lehzual a, kan khel tha takzet a ni,” tiin a sawi.