06 Dec 2018 02:28

inkhel

​Goal kan chhuah hnua kan khelhdan khan min ti lungngai – Sarri

Chelsea chuan Premier League inkhelah Wolves an tlawha, Blues hi chak zawk tura ngaih ni mahse Premier League kaithar Wolves an in lehthal tir.

Chelsea hian 18mins-ah Ruben Loftus-Cheek a goal hmangin hma an hruai a, mahse second half-ah mual neitu lamin an lehthala, London club hi 2-1 in an tlawm. Chelsea manager Maurizio Sarri chuan inkhel chungchang sawiin, “Minute 55 chhung kha kan khel tha em em a, mahse goal kan chhuaha, an goal hmasa zawk kha chu kan tihpalh a ni.

“Inkhel kan thunun a, mahse goal hmasa zawk kan chhuah hnuah erawh team dang daih kan ni a, kan khel kha a buai a, a chhan ka hre bik lo. Ka lungngai em em a, kan result vang ni lovin, goal kan chhuah hnua kan khelh dan khan min ti lungngai a ni. Goal kan chhuaha mahse engtin mah hma kan sawn lo khan min ti lungngai hle,” a ti.

Sawi zelin Sarri chuan, “Second half tir lam minute sawm chhung khan goal li vel lai khung thei kan ni. Morata chungchangah referee-in penalty pe tur a ni nge nilo lam ka sawi dawn lo, a chhan chu hun tha kan nei a, kan hun tha kan hmang tangkai lo,” a ti bawk.

Chelsea hi season tan tirah che tha hle mahse tunah erawh Premier League hmahruaitu Manchester City chu an hlat tawh hle a, Tottenham chuan lehpelin Blues hi palinaah an awm a, panganaa awm Arsenal nen an point hmuh zat a inang chiah.

Chelsea chuan tun inrinni hian hmahruaitu City an hmachhawn dawn a, tuna a lan mai dan chuan City hi an chak zawk a rinawm hle a, Chelsea hian City hi an hneh lova, Arsenal an chak bawk chuan karleh lam chuan Chelsea hi panganaah an awm daih thei tawh a ni.