Pathianni zing khan Real Madrid chuan La Liga match hnuhnung nerah Getafe 7-3 in an hneh a, Real Madrid tan hian Ronaldo chuan hattrick siamin, Hernandez, Rodriguez, Jese leh Marcelo ten goal an khung bawk a ni.

Getafe tan Escudero, Castro leh Lacen ten goal an khung a. Ronaldo hian First half darkar chanve an khelh tlin hmain hattrick a siam hman a, heng zingah goal khat hi penalty atanga a score a ni. Ronaldo hian tun season La Liga goal 48 a khung ta bawk a. 2011-12 season khan goal 60 lai competition hrang hrangah a khung tling. Kuminah kha a record kha goal khatin a khum a.

A elpui ber Lionel Messi chuan Ronaldo hi goal 5 in a phak lova. Ronaldo hian goal khung hnem hle mahse tun season-ah title pakhat pawh an la ta lo a ni. Ronaldo hi Norwegian Odegaard chuan second half-ah a rawn thlak a, Odegaard hian kum 16 leh ni 157 chiah niin Real Madrid senior team tan a inlan a, Real Madrid tana inlan naupang ber a ni ta a ni.

Ronaldo hian tun season-ah hattrick vawi 8 lai a siam ta a, mimal takin khel tha mahse trophy pakhat pawh a team a lakpui ta lo. Carlo Ancelotti dinhmun a derthawng hle niin a lang. Season hmasa khan Champions League vawi 10 Real Madrid-in an champion nan khan Ancelotti thluak kan hmu a, tun season-ah erawh an hawi hil ta. Real Madrid hian an chhuah tir mai rin a ni ta a ni.

Kum thum chhung Real Madrid tana contract ziak hi karleh lamah a chanchin kan hre chiang thei turah ngai ila. Chelsea leh AC Milan coach hlui Napoli coach ni mek Rafael Benitez chu Carlo Ancelotti thlak tu atana rin kai ber a ni mek a ni.