​Giroud leh Inter Milan an inrem

11th January 2020, 03:01AM

Inter Milan chuan Chelsea striker Olivier Giroud chu tun thlasik bazar chhung hian an lalut ngei dawn niin a lang chho zela, Sky Italia chuan Inter Milan leh Giroud-te inkarah inremna a awm tawh thu a tarlang.

Tun season zawh rualin Giroud hian Chelsea-a a contract neih lai a hmang zo dawna, mahse a contract zawh hma in Serie A lamah a kal dawn niin a langa, Inter hian kum 33 mi hi kum hnih leh a chanve daih contract an ziahpui dawn niin tarlan a ni.

Inter leh Giroud-te inkarah inremna awm tawh mahse Chelsea leh Inter-te hi an la inrem ve lova, Inter hian Giroud-a manah pound maktaduai 4 vel an inhuam laiin Chelsea hian pound maktaduai 8 vel tal an striker manah hian an duh niin a lang.

Chelsea hian an striker Giroud hi an chhawr ngai meuh lova, tun season zawh ruala a thlawna chhuak mai tur a ni bawk nen, a thlawna chan aiin Inter hnenah hian man tlawm taka an hralh a rinawma, club hnihte inkarah inremna a awm thuai a rinawm.

Chelsea manager Frank Lampard chuan striker atan Tammy Abraham a hmang nasa bera, a dawtah Michy Batshuayi hmang rim leh berin Giroud hian hmun a chang thei meuh lova, nikum November thla tawp atang khan French striker hi Chelsea tan a la inlan leh lo.

Giroud hian kum 2018 January thla khan Arsenal atangin Chelsea hi a zawma, Chelsea tan goal 19 a khung tawh. Tun season-ah Premier League-ah vawi nga bak a la inlan lo bawk. Kumin nipuiah hian Euro khelh a ni dawna, Giroud hi France tana rinrawl a ni chhunzawm zel duh a nih chuan tun thlaa Chelsea chhuahsan hi a tan a finthlak hle dawn a ni.

Copyright © inkhel.com 2024. All rights reserved.