Chelsea striker Olivier Giroud chuan tun thla chhungin Chelsea chhuahsana, London club dang Tottenham Hotspur chu zawm a hreh lo tih Sky Sports chuan a tarlang.
Kum 33 mi hian tun season-ah inkhelhna hmun a chang thei meuh lova, Frank Lampard-a hnuaiah Chelsea tan a la inlan lo tluk niin Stamford Bridge chhuahsan a duh hle nia sawi a ni.
Tottenham hian an striker Harry Kane a inhliam avangin striker thar an melh meka, mahse an chairman Daniel Levy chuan striker thar lei nan pound maktaduai 10 chiah a thehchhuah phal avangin Spurs hian Giroud-a lam hi an hawi ta mai niin a lang.
Spurs hian AC Milan striker Krzysztof Piatek bakah Real Sociedad forward Willian Jose chu ngaihven viau mahse an sum neihin a tlin rih loh avangin French striker Giroud hi an lak luh a ngaih hmel viau.
Tottenham goal thun khawl ber Kane hi tun thla ni 1 khan a inhiama, a hliam hi a ‘serious’ thawkhata, a hma berah pawh April thlaah bak a khelh theih a rinawm tawh lova, Spurs tan striker thar melh lohna chi a ni lo.
Giroud hian tun season kal mekah Chelsea tan competition hrang hrang vawi 7 chiah a la khela, Inter Milan nen sawizawm ni mahse Spurs hian Arsenal striker hlui hi North London lamah an hruai kir leh mai a rinawm ber ta zawk a ni.