Inrinni zan khan Girona chuan 4-2 in Barcelona an hneh a, La Liga atanga Champions League khel thei dinhmunah an inhlangkai chiang ta, hetih lai hian season tharah Champions League an khel thei dawn nge dawn lo tih a hriat loh.
Girona hi table-a 5-na Athletic Bilbao lakah point 13-in an fal ta a, khelh hmabak 4 la awm mah se, top 4-ah an awm dawn chiang tawh.
An club din tirh atanga a vawi khat nan Girona hi Champions League khel thei dinhmunah an ding. Head coach Michel-a hnuaiah tun season chu an chetha em em a, league hmahruaitu te an han ni ren rawn a, top 3 aia hniamah an awm lo.
2006-07 season khan Spain fourth tier-ah an khel a, 2007-08 season-ah third tier an kai leh a, chumi hnuah Segunda Division-ah kai lehin, top tier an lutchho chhunzawm.
Tunah hian Champions League khel thei dinhmunah an ding ta reng mai. Hetih lai hian season tharah Manchester City chuan Champions League an khelh dawn avangin, Girona hian UCL an khel thei dawn nge dawn lo a hriat loh.
Girona leh Man City te hi City Football Group ta ve ve an ni a, UEFA danah chuan, neitu thuhmun club te chu competition khata tel remtihsak an ni lo.
Kum 2017 August thla khan City Football Group hian Girona stake 44.3 per cent an lei a, kum 2020 khan 47 percent lai an lei leh bawk.
UEFA danah chuan, club pahnih neitu thuhmun te chu, competition khata an tel a rem lo a, City leh Girona te karah hian, league-a chetha zawk zawk chuan UCL an khel ang a, a chetha lo zawk chuan Europa League a khel ang.
Hetih lai hian kum 2018 han Red Bull club pahnih RB Leipzig leh Red Bull Salzburg te chuan Champions League an khel ve ve a, hei vang hian Girona hotute te chuan season thara Champions League khelh theih an inring hle.