Gionee LPS Pro Fight : Day 7 Results

15th November 2017, 06:11PM

Gionee LPS Pro Fight 2017 chu  November 14, Thawhlehni zan khan Ramhlun Boxing Hall-ah khelh chhunzawm a ni a, inhnek vawi 13 a awm a, mipui 320 zet Pro Fight enturin an pung khawm bawk.

Lightfly - 5 Results

Denis Lallawmsanga (Chawngtlai) bt Lalrempuia (Vangtlang) Split Decision (29-28, 29-28, 28-29)

An inhnek tawk hle a, round hmasa ber leh hnuhnung berah Denis Lallawmsanga'n nawr hnehin a dingin fuh takin a hnek fo. Round hnihnaah Lalrempuia a che tha a, inhnaihchilhah a kut a dik zawk a, mahse, chak tur khawpin a tir atanga a tawp thlengin a khel a mar zo lo.

Thangkhanmunga (Sawleng) bt Laltlanzova (Khawzawl) Knockout (Round 2)

Tharum nei tha Thangkhanmunga'n ngam takin a bei a, a ding lamin na takin a hmaiah a hnek zawn a, Laltlanzova a tlu. Referee F Lalnienga'n a chhiar a, inbei zui leh. Round hnihnaah Munga'n nasa zawkin a thunun a, a ding lamin a vekah chiang takin a vai fuh a, Tlanzova tlu lehin a tho chhuak tawh lo.

Zoremmawia (Hnahlan) bt Lalramhmangaiha (Maubawk) Split Decision (29-28, 29-28, 28-29)

Zoremmawia'n umin remchang a zawng nasa a, hnek tam lo mah ae a hnek chhuah chhun a khawng thain chiang taka fuh a awm bawk. Lalramhmangaiha'n tawlh pahin a hnek reng a, mahse, a kutthlak a na lovin a dik tawk lo va, hnek chhuak tam zawk hle mah se awmzia a nei tham lo.

Michael Airawn (New Delhi) bt Vanlalhluna (South Lungpher) Unanimous Decision (29-28, 29-28, 29-28)

Round hmasa pahnihah mittlung pangngai takin Michael Airawn chuan a khel a, round thumnaah chau hle mah se a chak hram. Michael-a hian thiamna pangngai tak lantirin thiam taka thle kualin lehlam hnek a bum hnem a, fuh takin a vei leh ding vai chhuakin a dinhmun a siam. Khan sang zawk Vanlalhluna'n hnek fuh a harsat a, round tawp berah erawh Michael-a a chau chhia a, Hluna'n a hnek fuh fo.

VL Hmangaihchhunga (Siahatla) bt Rammuanawma (Chhipphir) Technical Knockout (Round 2)

An sa a tha dun viau a, a tirlamah an innuai tawkin na tak takin an inhnek tawn. VL Hmangaihchhunga'n a hnek chhuak tamin a kut chhuak a dik zawk a, round hnihnaah nasa takin an innuai a, Hmangaihchhunga'n a hnek hneh zawk a, Rammuanawma talbuaiin referee B Lalhriatpuii'n a chhiar a, inhnek a titawp zui.

Bantam - 5 Results:

Daniel Lalmuansanga (Chhingchhip) bt Reuben Malsawmtluanga (Govt Complex) Unanimous Decision (30-27, 29-28, 29-28)

Daniel Lalmuansanga'n tharumin a hneh a, ngam takin a nawr a, ngil taka a hnek chhuah hmangin a chhaih buai a, Reuben Malsawmtluanga a chhang let zo lo va, a tawlh kual nasa hle. Govt Complex boxer hian an inbeih chhungin a ngam lo tluan a, inhnek tam lo mah se harsa lo takin Muansanga a chak.

F Lalremruata (Mamit Field Veng) bt C Laltanpuia (Hnahthial Chanmari) Unanimous Decision (29-28, 29-26, 30-27)

F Lalremruata'n tlo takin a khel a, thahrui nei tha zawk a nihna chhawr telin C Laltanpuia'n hnek chhuak dik viau mah se a khawng tawk lo va, harsatna a tawk. Round hmasa berah nasa takin an inhnek tawn a, Tanpuia'n ama thuin chhuanlam a siam a, a chawl ringawt a, referee Lalngaihawma Hnamte chuan a chhiar. Round hnihnaah Remruata'n nawr hnehin lehlam a talbuai a, Ngaihawma'n a chhiar leh a, ding chhuakin a tawp thlengin Tanpuia'n bei mah se a bet zawkah a tang.

Zautea Nungate (Muthi) bt Khenpauva Samte (Teikhang) Technical Knockout (Round 1)

Thiamna nei tha zawk Zautea Nungate chuan a tirah a vei leh dingin a hnek zawn nghal a, boxing-a mikhual tak Khenpauva Samte talbuaiin referee Lalngaihawma Ngente chuan a chhiar. An inbei zui leh a, Zautea'n na takin a hnek zawn a, Khenpauva a hawi buai a, Ngaiha'n inhnek a titawp.

Lalramthara (Zanlawn) bt David Zothansanga (Mualpheng) Split Decision (30-27, 28-29, 30-27)

Fimkhur takin an inbei a, inhnek fuh an harsat tluan ve ve a, an khel a zuai hle. A nawrtu zawk Lalramthara'n a hnek chhuak tam a, David Zothansanga'n ngil takin vawi hnih khat a chhuah ve thung a, langsar tham khawpin a tu zawk mahin an thunun zo lo.

Malsawmsanga (Chhingchhip) bt Lalremruata (Tlangnuam Vengthar) Technical Knockout (Round 3)

Lalremruata'n tharum hmangin a nawr a, Malsawmsanga'n thiamna nei tha zawk a nihna entirin chiang takin a hnek let a, a rei tial tiala Sawmsanga a chungnung telh telh. Round hnihnaah Remruata'n a tuar tam hle a, round thumna tan dawnah a inhnukdawk.

Light - 3 Results:

Lalthanzuala (Phulmawi) bt Lalrinpuia (Kolasib Hmar Veng) Knockout (Round 3)

Lalthanzuala'n inveng tha takin a pan a, rang leh ngil takin a vei leh ding a chhuah zawn zauh zauh a, inringtawk takin Lalrinpuia'n remchang melh mah se chet a harsat. Fimkhur takin an inveh a, inhnek tawnah Thanzuala a tha zawk a, an vai khawng dun hle. Round thumnaah Thanzuala'n na takin a ding lamin a khabe bawrah a a vai siah a, Remruata tluin referee C Vanlalchhuanga'n a chhiar a, tho leh tum viau mah se a lu a hai hle tih a lang a, inhnek a tawp.

Samuel Lallawmzuala (Durtlang North) bt Lalchhuanawma (Chawlhhmun) Technical Knockout (Round 2)

Samuel Lallawmzuala'n a tir atangin a thunun tha hle a, tharum leh thiamnaah a chungnung a, Lalchhuanawma'n a khing zo lo. Round hnihnaah Lawmzuala'n a hmaiah a hnek zawn a, Chhuanawma'n a chiai a, referee C Vanlalchhuanga'n chhiarin inhnek a titawp zui.

Lalruatkima (Chhiahtlang) v H Lalruatfela (ITI Veng) An pahnihin an inlan lo ve ve a, walk over ve vein an chak lo.

(adsbygoogle = window.adsbygoogle || []).push({});

Copyright © inkhel.com 2024. All rights reserved.