Gilmour a inhliam na; a chawl rei dawn

11th July 2020, 03:07AM

Chelsea midfielder Billy Gilmour chu Crystal Palace an hmachhawn tuma a intih nat avangin tun season-ah a inlan thei tawh dawn lo tih tarlan a lo ni tawha, Gilmour hi rin aiin a inhliam na a, a chawl rei dawn hle.

Premier League-ah khelh li chiah Chelsea hian an nei tawha, Gilmour hi a khup hliam avangin heng game li khelh tur la awmah te hian kan hmu tawh dawn lova, FA Cup semi-final ah Manchester United a hmachhawn thei dawn lo bawk tih tarlan a ni tawha, mahse August thlaa Champions League khelh chhunzawm a nih hunah a inlan leh theih tawh mai a rinawm laiin, thla li vel lai Gilmour hi a chawlh a ngai dawn.

Chelsea manager Frank Lampard chuan Zirtawpni khan Gilmour-a khup hi zai a nih thu a sawia, hemi avang hi thla li vel tal a chawlh a ngaih thu Lampard hian a sawi. Lampard chuan Gilmour-a chungchang sawiin, “Zirtawpni khan zing khan Gimour-a khup zai a ni a, rin dan chuan thla thum emaw thla li emaw tal vanduaithlak takin a chawlh a ngai dawn. Pawi ka ti em em a, Billy-a ngei pawhin hrehawm a ti a, rei tak nimin lam khan kan inbia. Theih ang angin kan support-a, a tan kan inhawng reng a ni,” a ti.

Chelsea-in an game hnuhnung bera Crystal Palace an hneh tumin, Gilmour hian inkhel bul a tana, Matteo Kovacic leh N’Golo Kante-te an inhliam avanga an khelh theih loh avangin, Chelsea manager Lampard chuan pound maktaduai 57 man Jorginho aiah kum 19 mi Gilmour hi inkhel bul a tan tir.

Gilmour hi a khel tha hle nghe nghe a, vawi 62 lai pass dik neiin, he inkhelah hian Gilmour aia pass dik nei hnem an awm lova, a pass zawng zawng atanga 91% a dik. Palace lakah minute 10 khelh tur a la awmin, Gilmour hi lakchhuah a ni a, a aiah Jorginho dah luh niin, hei hi tun season atana Gilmour-a game tawp ber a ni dawna, season thar tan tir lamah pawh a khelh thei mai a rinawm loh.

Copyright © inkhel.com 2024. All rights reserved.