05 Apr 2019 10:13

inkhel

Giannis hi kan mitah chuan MVP a ni: Budenholzer

Mike Budenholzer chuan Eastern Conference-a Milwaukee Bucks top seed an nih hnuah Giannis Antetokounmpo chu an mitah MVP a nih thu a sawi chhuak.

Nilaithawhtan khan Milwaukee Bucks chuan 128-22 in Philadelphia 76ers chu an hneh a, he inkhelah hian Giannis Antetokounmpo chuan point 45 ngawt mai a thun a. Bucks forward Antetokounmpo hi NBA MVP award dawng thei tura beiseiawm ber pawl a ni mek a, Bucks head coach Budenholzer chuan he chawimawina hi Giannis chuan a dawn ngei a beisei thu a sawi a ni.

Budenholzer chuan, “Giannis hian point score chauh lo pawh a thiam hle a, 76ers nen kan inkhelh pawh khan block 5 a nei a, rebound 13 a la bawk a, hei hian defense lamah pawh a that zia a ti chiang hle a ni,” a ti.

“Inkhel boruak a thlak danglam thei a, George Hill ball a pek dan te, a ball khawih dan te, a finishing te, free throw a thun dan zawng zawngte khan a tha a ni tih a lantir zel a. Kan mitah chuan MVP hi a ni chiang a, hei vang tak hian kan hnenah pawh awm zui zel se kan duh a ni,” a ti bawk.

Antetokounmpo chuan an team chak dan chu lawmawm a tih thu a sawi a, an khelh dan pawh lungawithlak a tih thu a sawi bawk a. “Kan team khan kan khel tha ka ti hle a, a tawp thlenga rilru fim tak pu chunga kan khelh theih avangin dinhmun tha takah kan din theih phah niin ka hria,” a ti.

“Player an rawn lut a, point an rawn score teuh teuh a, defense tha takin an vawng thei bawk a, theihtawp kan chhuah tlang bawk a, kan tan hun duhawm tak a inher chhuah theih phah a. Hetiang zel hian chhunzawm chho thei ila a duhawm khawp mai,” a ti bawk.