14 Jul 2020 12:37

bakteaJr.

Mizo tlangval

Gerrarda Pa chanchin tlangpui

Francis Paul, Mizo te'n Gerrard-a pa tia kan hriatlar em em chuan tukin (14/7/20) zing dar 5:30 khan chatuan ram min pansan thut maia, inkhel.com chuan pawi kan tiin kan ui hle a, Pu Francis-a kalsan tak a chhungkhat laina, thian leh Mizoram Liverpool fans zawng zawng te kan tawrhpui tak zet a ni.

Gerrard-a pa chanchin tlangpui-

Pianna:
Francis Paul hi kum 1978 February 19-ah Serchhip P&E Vengah a piang a. Unau pasarih niin a upa ber dawttu a ni. A pa hi Paul TK Donga niin a nu hi Margareth Zomawii a ni.

An unau:
1. Carmel Thangngaihmangi (L)

2. Francis Paul h/o Zoramthari, New Capital Complex

3. Robert Lalnuntluanga h/o Helen Lalengmawii, Aizawl Venglai

4. Jerome T. Liansanga H/O Thanhnuni( Zemabawk North)

5. Rita C. Zamawii ( L)

6. Nancy D. Neihzovi w/o Kevin Kenye

7. James Khamliansawma h/o Olivia C. Lalmalsawmi, Lunglei Serkawn DIET

Zirna lam:
Catholic school Mariam School, P&E Veng Serchhip-ah Nursery atanga Class-V thleng a kal a, 1989-ah Aizawlah an chhungkuaa pemin Mary Mount School Tlangnuamah Class VI a zawm a, hemi hnu hian St Xavier Zemabawkah te kalin Zuangtui High School-ah leh Holy Cross School-ah HSLC a zo a, PU hi Hrangbana College-ah kalin BA (History) a zawh thlengin a kal a ni. 

Chhungkaw lam:
Kum 1997 ah Teresa Hmangaihpari nen inneiin kum 2009 khan an inthen a, hemi hnu hian Zoramthari nen an innei leh a ni.

Fa pali a nei a:
1. George Dongsangliana

2. Gabriel Liantharmawia

3. Gerrard Lalawmpuia

4. Bridget Zosangmawii 

A fa upa ber hian B.Com final semester Pachhunga University Collegeah a zir mek a. Gabriel-a hian Class XII (Arts) chu 1st Division-ah a pass chiaha, a naupang ber dawttu hian Class-X, a naupang ber hian Class-IX a zir mek a ni.

Khawtlanga inhmanna:
Zuangtui Vengah chhungkua an inbengbel a, YMA Zuangtui Branch hnuaiah an awmna - Taitesena Section YMA-ah theih ang anga inhmang ve in, secretary a ni tawh a. YMA aiawha chetchhuah ngaihna - solo competition leh debate ah te section aiawhin a tel thin a, a tel ve tawhnaah chuan theihtawp chhuah thin mi a ni. Zuangtui Vengah hian Games & Sports Association-ah hruaitu kumhlun, hun rei tak chhung president leh secretary hna te lo chelh tawh a ni a, an venga football khaidingtu ber niin, an veng puala field neih tuma theihtawp chhuahtu a ni.

Eizawnna leh a behbawm:
College a kal lai, a graduate hma deuh hian taxi leiin amahin a khalh nghal a, a graduate hnu hian St Lawrence High School Ramthar Vengah zirtirtu in a thawk a, hostel-te siamin Ramthar Vengah hian chhungkua dinin a inbengbel zui a ni. Zirtirtu hna hi bansanin Doordarshan Kendra Aizawlah news reporter anga lutin a thih ni thleng hian DDK Aizawl-ah hian Sports magazine programme kalpui tan a nih anga a thih ni thlengin he programme hi a enkawl a ni. Hei bakah LPS Cable TV-ah infiamna lam chanchin programme a nei a, vawi duai lo football tournament - MFA leh ADFA buatsaihahte live commentary pe thintu a ni bawk. Mizoram State Sports Council-ah a zawnin term thum (3) - 2011 - 2014, 2014- 2017 leh 2017- 2020 member a ni a.

MJA member:
Francis Paul hi kum 2010 khan Mizoram Journalists’ Association-ah member-a lakluh a ni a, MJA thiltih nikhuaah a tangkaiin thiante tihlimtu ber niin a thih ni thleng hian member a ni a. MJA chuan a member tangkai a chan hi a ui takzet a ni.

Infiamna lama tui mi:
High school a kal lai atangin ama sum thawhchhuah hmangin hetih hunlaia India rama sports amagzine hriat hlawh leh darhzau tak Sports World chu a lei thin a, a nei kim thin hle niin a chhungte chuan an sawi. Football chauh niloin Cricket, Tennis, Basketball, Badminton athletics a tuiin henga infiammite chanchin a hre em em a ni. Football lama a sulhnu: Football hi a tui em em a, a khelh pawh a khel thiam a, a vanglaiin 1st Division player ni pha a ni, a hun tam zawk hi Zemabawk Football Club tan a khel a ni. 1993 ah Paragon Football Club din a ni a, a sulsutu ber a ni. A fapa hming chawiin George Football Club a din a, inkhelh a chawlhsan hnu ah pawh Mizoram Football Association lamah inhmang zuiin kum 10 vel chu Executive Committee member niin Sub Committee hrang hrangah te a lo tel tawh thin a ni. Football hmasawnna tur duhna avangin an thian hoin Mizoram Football Management Group te dinin engtin nge Mizoramah I-League football khelh a nih theih ang tih chu an ‘dream’ ber a ni thin. I-League a Mizoram club an khelh dan tur kawng dapin Dinthar FC atangin an tan a, hemi hnu hian Aizawl FC hi an tinung thar leh a, tuna Aizawl FC chairman ni ta leh Sports minister ni mek Pu Robert Romawia Royte te sawmlutin tun hi an thleng ta a ni. All India Football Federation hmalakna leh MFA thahnemngaihna in India rama a hmasa ber atan Mizoramah Grassroots Development Programme tan a ni a, hetah hian Development Officer nihna chelhin he dinhmun chelh hmasa ber a ni. Grassroots and Youth Development Commitee ah secretary a ni tawh bawk. A kaihhruainain naupangte chher kawngah an titha hle a, India ramah Grassroots Development lama a titha ber lawmman pawh MFA hian a dawn phah nghe nghe a ni. 31st Under-16 Sub Junior National Football Championship for Mir Iqbal Hussain Trophy 2008, Mahipur Punjab-a khelhah MFA chuan Mizoram team tirin manager a ni a. Hemi tum hian final-ah a thlengtu Punjab chu 1-0 a hnehin an champion a ni. Tualchhung football leh India ram football bakah ram hrang hrang - a bikin European football league tuipui leh hre bel em em an ni a. Amah hi Liverpool FC tantu niin kum 2008 khan, hetihlaia Mizoten an la tih ngai vak loh chu tiin Mizoramah a thiante, Liverpool FC tantu ruhkawl dangte nem Liverpool FC Fan Club an din a, amah hi chairman ah dah a ni. England lama Liverpool Fan Club te nen inzawmna siamin Mizoram mai nilo india ram puma Fan Club inziaklut hmasa ber leh chuta a chairman hmasa ber a ni ta a, official member te a zuk ni pha nghe nghe a ni.

A mizia:
Mi hlim thei leh nui duh mi tak, zai ngaina em em, zai hruaitu ber leh hla chi hrang hrang hre tam a ni. Naupang atanga upa lam thlenga kawm thiam em em a ni. A nu a ngaisangin hmeichhia ‘care’ thiam, tlawmngai thei leh tuarchhel, vuivaina nei lo mi a ni. A thih thlengin a natna lama harsatna a sawi lo a, kohhran lamah inhmang viau lo mahse, Catholic-ah a nghet a, tawngtaina a ngaina hle a ni.

A hun hnuhnung:
Francis Paul hi pa hrisel tak a ni thin a. Ni 10.07.2020 (Zirtawpni) khan a pum a nuam lo a, Ebenezer damdawi in ah kalpui a ni a. A tuk Inrinni ah endoscopy te tih a niin pumpui lawng niin doctor te chuan an sawi. Thawhtanni pawh khan a nupui office kai tur a la thlah a, mahse tlai lamah chuan a nawmsam loh avangin a hruai thei lo a. Nizan lamah te pawh chhungkua in zanriah an kilho a. Tukin zing dar 4:30 vela a inthiar zo chu a chau a tlu a, Ebenezer damdawi in panpui niin zing dar 5:00 vel khan a thi tih doctor te chuan an sawi a ni. A thih chhanah hian doctor te chuan lungphuchawl (heart attack) niin an sawi.

Source: Mizoram Journalists Association General Hqrs.