Liverpool striker hlui, tuna Barcelona tana khel mek Luis Suarez chuan kum 2013 khan Arsenal a zawm teuh thu a sawi a, khatih hunlaia Liverpool captain Steven Gerrard-a vang chauhin Arsenal a zawm lo niin a sawi.

Kum 2013 khan Suarez chuan vun rawng inhmuhsit chungchangah leh mi a seh chungchangah thubuai rit tak a awrh a, kha tih lai khan Arsenal manager Arsene Wenger chuan Uruguayan forward hi Liverpool atanga lakluh tumin, a release clause pawh pek a inhuam hman.

Suarez hian Arsenal zawm hi a rilruk hmana, Liverpool nen pawh inremna thar a neih pui duh lo nghe nghe. Gerrard chuan Suarez hi Liverpool-a cham leh turin a hmin a, Arsenal aia team tha zawk in an dawr tur thu sawiin, a sawi hi a thleng ngei bawk.

Suarez chuan, “Europa League khel turin kan inpet tlinga, mahse season kan hmang tha lo hle. Arsenal zawm kha ka tum a, chhuah kha ka tum nghet hman hle bawk. Mahse Steven-a khan ‘tun season hi i cham leh chuan i che tha dawn a, nakkumah Bayern Munich, Barcelona emaw Real Madrid velin an dawr che anga i duh duh i zawm thei ang. Kumin chu kan hnenah cham leh la, Arsenal-a i kal ai chuan i tan a tha zawk ang’ min ti,” a ti.

Sawi zelin Suarez chuan, “Kha kha khatih hunlaia Steven-a nena kan titi hnuhnun ber a ni a, ka agent hnenah chuan cham zel turin ka rilru ka siam fel thu ka hrilh zui. Steven-a thusawi khan min hmin a, keimah min ngaihsak tu ka atanga chhuak a ni a, ka tana a tha ber duh mi niin training-naa a hma ka phak loh zia a hmuh bakah ka hlim lo tih pawh a hria. Captain dik tak ka atanga chhuak a ni a, keimahah nghawng a nei nghala, min pui nasa hle a ni,” a ti.

Suarez hian kum 2011 khan Ajax atangin Liverpool hi a zawm a, Gerrard-a sawi ang chiahin kum 2014 khan Barcelona chuan kum 32 mi hi Liverpool atangin an lei chhuak ta ngei a ni.