Kum 2014 World Cup champions Germany chuan friendly match-ah Russia hmachhawnin, Germany hian si thum faiin hnehna an chang.

Germany tan hian Manchester City winger Leroy Sane chuan goal hmahruai a khunga, Sane bakah hia Bayern Munich defender Niklas Sule leh Serge Gnabry-te chuan goal khat ve ve an khunga, goal thum lutte hi first half-a lut vek an ni.

Germany hi tun hnaiah an che tha lo hle a, inelna hrang hrangah chak an harsat hle. September thla ni 10-a Peru an hneh hnuah Germany hi an vawikhat chak leh na a ni a, Peru nena an intum pawh hi friendly match tho a ni.

Germany hi kumin World Cup-ah champion lai ni chungin inlan mahse an mualpho hle a, group stage pawh an paltlang zo lo.

Germany hian tun international break chhung hian UEFA Nations League –ah Netherlands an hmachhawn leh dawn a, Germany hian Nations League-ah hian chak la nei lovin game thum atangin point khat chiah an la hlawhchhuak a, an group mawngphahah an awm.

Germany hi UEFA Nations League-ah hian group A-ah awmin, Netherlands leh France-te nen an awm hova, sawilan tawh angin Germany hi an hniam ber. Tun zirtawpi hian group A-a awm dang Netherlands leh world champion France an inhmachhawn dawn a, Netherlands hian France hi an hneh a nih chuan Germany hi Nations League atangin an tla dawn a ni.